قۇرىلعانىنا ءتورت جىل تولعان «الاتاۋ» ءداستۇرلى ونەر تەاترى ءوز كورەرمەندەرىن تىڭ باستامالارىمەن قۋانتىپ كەلەدى. اتالعان ونەر ورداسىندا «ەلىن سۇيگەن ەلباسى» دەگەن تاقىرىپپەن ەلىمىزدىڭ تۇڭعىش پرەزيدەنت كۇنىنە ورايلاستىرىلعان مەرەكەلىك شارا ءوتتى. كونتسەرتكە الماتىلىق زيالى قاۋىم وكىلدەرى قاتىستى.
سالتاناتتى كەشتە ونەر ورتالىعى تىكەلەي ەلباسىنىڭ قولداۋىمەن بوي كوتەرگەنى ايتىلىپ, ءان مەن جىردان شاشۋ شاشىلدى. ەسىمدەرى ەلگە تانىلعان جاس ونەرپازدار فولكلورلىق-ەتنوگرافيالىق ءانسامبلدىڭ سۇيەمەلدەۋىمەن, سىرنايمەن جىر ورىنداپ, قازاقتىڭ حالىق اندەرىن قوبىز ۇنىنە قوسىلا شىرقادى.
كەش بارىسىندا «الاتاۋ» ءداستۇرلى ونەر تەاترىنىڭ شىعارماشىلىق ۇجىمى ەلباسى جايلى شاعىن سپەكتاكلدى ساحنالادى. تەاتر باسشىلىعى تۇڭعىش پرەزيدەنتتىڭ ءرولىن سومداۋ اكتەرلەرگە ۇلكەن جاۋاپكەرشىلىك جۇكتەگەنىن ايتادى.
«جالپى سپەكتاكلدىڭ قۇرىلىمى ەلباسىنىڭ جاس كەزى, ودان كەيىن تەمىرتاۋ وقيعاسىن قامتيدى. جانە جوعارى كەڭەس توراعاسىمەن كەزدەسۋ ساحنالارىن ۇيىمداستىرىپ, كونتسەرتتىك دۇنيە جاسادىق. ەلباسىنىڭ بولاشاققا جولداعان جولدامالارىن ءاربىر اكتەر ءتۇسىنىپ, جۇرەگىمەن سەزىنە ءبىلۋى كەرەك. ەڭ كوپ ۋاقىت العان سول ساحنالار بولدى», – دەيدى «الاتاۋ» ءداستۇرلى ونەر تەاترىنىڭ رەجيسسەرى جاندوس تولەۋبەك.
الماتى