قازاق گەولوگيا سالاسىنا ايشىقتى ۇلەس قوسقان كورنەكتى قوعام قايراتكەرى پاتشايىم تاجىباەۆانىڭ تۋعانىنا بيىل 100 جىل تولدى. وسىعان وراي الماتىدا عالىمنىڭ مەرەيتويىنا ارنالعان حالىقارالىق عىلىمي كونفەرەنتسيا ءوتتى.
ايتۋلى ءىس-شاراعا قوعام قايراتكەرلەرى, ۇلتىمىزدان شىققان تۇڭعىش گەولوگ عالىمنىڭ ارىپتەستەرى مەن شاكىرتتەرى قاتىستى. باسقوسۋدا پاتشايىم تاجىباەۆانىڭ دارا جولى تۋرالى پايىمدى ويلار ايتىلىپ, ونىڭ عىلىمعا قوسقان ۇلەسى مەن جەتىستىكتەرى, قوعامدىق قىزمەتتەردەگى تابىستى ەڭبەگى تۋرالى باياندالدى.
«پاتشايىم تاجىباەۆاعا دەيىن جەراستى بايلىعىن تاستى ۋاتىپ, سوعان قاراپ بىلگەن. ال بۇل كىسى وعان قاناعاتتانباي, ۇكىمەتتەن كومەك الىپ, لابوراتوريا اشىپ, گەولوگيانىڭ ليتولوگيا دەگەن سالاسىن قالىپتاستىرعان. ول گەولوگيادا رەۆوليۋتسيا جاساعان ادام», – دەيدى مەملەكەتتىك سىيلىقتىڭ لاۋرەاتى, جازۋشى ءسابيت دوسانوۆ.
عىلىمي كونفەرەنتسيا بارىسىندا پاتشايىم تاجىباەۆاعا ارنالعان ەستەلىك كىتاپتىڭ تۇساۋى كەسىلدى. ەستە بولسا, وسىعان دەيىن دە عالىمنىڭ ۇلان-عايىر ەڭبەگىن ناسيحاتتاعان ەكى بىردەي جيناق جارىق كورگەن ەدى. بۇل كىتاپتا عالىمنىڭ ارىپتەستەرى مەن شاكىرتتەرىنىڭ پىكىرلەرى مەن ەستەلىكتەرى, عالىمعا ارناعان ولەڭ جىرلارى, ەستەلىك-ەسسەلەرى توپتاستىرىلعان.
الماتى