ساندۋعاش ءۇنى سالقار دالانى تەگىس تەربەگەن بيبىگۇل تولەگەنوۆا بيىل توقسان جاسقا تولدى. حالىق ءارتىسىنىڭ مەرەيلى بەلەسىنە ارنالعان كەزەكتى شارا قۇرمانعازى اتىنداعى قازاق ۇلتتىق كونسەرۆاتورياسىندا جالعاسىن تاپتى.
قازاق ءان كوگىندە قالىقتاعان بۇلبۇل ءۇننىڭ قۇدىرەتىنە باس يگەن مارتەبەلى تىڭدارمان ساراي ءىشىن لىق تولتىردى. جەزتاڭداي ءانشىنىڭ قۇرمەتىنە ارنالعان كەشتە حالىق اندەرى مەن ايگىلى رومانستار قاتار شىرقالدى. مەرەيتوي يەسى ساحنا تورىنە شىعىپ ابايدىڭ «جەلسىز تۇندە جارىق اي» ءانىن تامىلجىتا ورىنداعاندا, تەبىرەنە تىڭداعان جۇرت «سىرلى اياقتىڭ سىرى كەتسە دە, سىنى كەتپەيدى دەگەن وسى شىعار» دەستى. تالاي اسۋدى اتتاسا دا سيقىرلى سازى مەن ادەمى قالىبىنان جاڭىلماعان بيبىگۇل احمەتقىزى ىستىق ىقىلاسپەن كەلگەن حالقىنا ىزگىشۋاق كوڭىلىن جەتكىزدى.
ء«الى كۇنگە دەيىن قولىمنان كەلگەنشە ەلىمە پايدامدى تيگىزگىم كەلەدى. ويتكەنى مەن ساحناعا شىعىپ, ءان ايتقاندا قانشاما ادام وسىندا وتىرىپ, ءنار, كۇش الىپ كەتەدى. مەن ءۇشىن ودان ۇلكەن دارەجە, ودان بيىك اتاق جوق. ءاردايىم ەلىمنىڭ الدىندا تىزەمدى بۇگىپ, ءيىلىپ سالەم بەرگەن سايىن حالىققا سۇيسىنەتىنمىن. جاسىم ۇلكەيگەن سايىن حالىق اياعىنان تىك تۇرىپ, مەنى قارسى الادى. باقىت دەگەن وسى شىعار», دەپ تەبىرەندى كسرو جانە حالىق ءارتىسى بيبىگۇل تولەگەنوۆا.
اتى اڭىز ءانشىنىڭ داۋىسىن ەستۋ ءۇشىن جينالعاندار ونەر يەسىنە ىستىق ىقىلاستارىن ءبىلدىرىپ, گۇل شوقتارىن ۇسىندى. كونتسەرتتىك شارا بارىسىندا ءانشىنىڭ ارىپتەستەرى مەن شاكىرتتەرى دە ونەرىن ورتاعا سالدى. بيبىگۇل تولەگەنوۆا اتىنداعى حالىقارالىق ۆوكاليستەر كونكۋرسىنىڭ لاۋرەاتتارى راسۋل جارماعامبەتوۆ, ءمادينا ورازباي, بالۋان بەركەنوۆ, حالىقارالىق كونكۋرستاردىڭ لاۋرەاتى ءمادي مادياروۆ, قازاقستاننىڭ ەڭبەك سىڭىرگەن قايراتكەرى تولقىن زابيروۆا, يان رۋدكوۆسكي جەتەكشىلىك ەتەتىن كونسەرۆاتوريانىڭ ارالاس حورى جانە وزگە دە دارىندى جاستار اسەم انمەن سالتاناتتى دۋماننىڭ ءسانىن ارتتىرا ءتۇستى.
– ايتۋلى كەشتىڭ وسى قۇرمانعازى اتىنداعى كونسەرۆاتوريادا ءوتۋىنىڭ وزىندىك ەرەكشە سەبەبى بار. مۇندا بيبىگۇل تولەگەنوۆا ءبىلىم الىپ, قازىرگى ۋاقىتقا دەيىن ستۋدەنتتەرگە ءدارىس بەردى. ۇلىلارىمىزدى دارىپتەپ, ولاردىڭ ونەگەسىن قازىرگى جاستارعا ۇلگى ناسيحات ەتۋ ءبىزدىڭ مىندەتىمىز. ءبارىمىزدىڭ اقجارقىن انامىزعا اينالعان, قازاقتىڭ بۇلبۇل ءانشىسىنىڭ 90 جىلدىعى قۇتتى بولسىن. وسىعان وراي ەلىمىزدىڭ تۇكپىر-تۇكپىرىندە كوپتەگەن ءىس-شارالار ءجۇرىپ جاتىر. مۇنىڭ ءبارى بيبىگۇل اپامىزعا عانا ەمەس, كۇللى قازاق ونەرىنە جاسالعان قۇرمەت, – دەيدى قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ.
ونەگەلى ءومىر جولىندا كيەلى ونەردىڭ كيەسىن كەتىرمەي, تۇنىعىن لايلاماي, جۇرت جۇرەگىنىڭ جۇلدەسىن العان تولەگەنوۆانىڭ تاعىلىمى تۇتاس ۇرپاققا مۇرا. ال جەزتاڭداي ءانشىنىڭ مەرەيلى تويىنا ارنالعان شارالار شوعىرى جالعاسا بەرمەك.
الماتى