قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى قالمۇحانبەت قاسىموۆ, قىرعىز رەسپۋبليكاسى قاۋىپسىزدىك كەڭەسىنىڭ حاتشىسى دامير ساگىنباەۆپەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
بىشكەك قالاسىندا قازاقستان رەسپۋبليكاسى جانە قىرعىز رەسپۋبليكاسى قاۋىپسىزدىك كەڭەستەرى اپپاراتتارى اراسىنداعى كەڭەيتىلگەن جوسپارلى كونسۋلتاتسيالار ءوتتى.
قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى قالمۇحانبەت قاسىموۆتىڭ جانە قىرعىز رەسپۋبليكاسى قاۋىپسىزدىك كەڭەسىنىڭ حاتشىسى دامير ساگىنباەۆتىڭ توراعالىعىمەن وتكەن كەلىسسوزدەرگە ورتالىق مەملەكەتتىك ورگاندار باسشىلارى قاتىسىپ, ىنتىماقتاستىقتىڭ وزەكتى ماسەلەلەرى تالقىلاندى.
تاراپتار وڭىرلىك قاۋىپسىزدىكتىڭ قازىرگى جانە ىقتيمال قاۋىپ-قاتەرلەرى بويىنشا پىكىر الماسىپ, حالىقارالىق تەرروريزمگە جانە ءدىني ەكسترەميزمگە بىرلەسكەن قارسى ارەكەتتى ەگجەي-تەگجەيلى قاراستىردى. ونىڭ ىشىندە بۇگىنگى قالىپتاسقان احۋالدى ەسكەرە وتىرىپ, الداعى ۋاقىتتا اتالعان باعىتتا ۇيلەسىمدى جۇمىستى كۇشەيتۋدىڭ ماڭىزدىلىعى ايتىلدى.
سونىمەن قاتار كونسۋلتاتسيالار بارىسىندا زاڭسىز ەسىرتكى اينالىمىمەن كۇرەس جانە ميگراتسيالىق زاڭدىلىقتى بۇزۋ بويىنشا قازاقستان مەن قىرعىز مەملەكەتتىك ورگاندارىنىڭ ىنتىماقتاستىعى ءسوز بولدى. بۇل باعىتتارداعى ءوزارا ارەكەتتەستىكتىڭ قازىرگى جاعدايىنا تالداۋ جۇرگىزىلىپ, جۇمىستى جاقسارتۋ ماقساتىندا ناقتى ۇسىنىستار جاسالدى.
جۇمىستىڭ ناتيجەلەرى بويىنشا ەكى ەلدىڭ ءتيىستى مەملەكەتتىك ورگاندارىنا ناقتى تاپسىرمالار بەرىلدى. بۇدان باسقا ق.قاسىموۆ پەن د.ساگىنباەۆ 2020-2021 جىلدارعا ارنالعان قازاقستان مەن قىرعىز قاۋىپسىزدىك كەڭەستەرى اپپاراتتارى اراسىنداعى ىنتىماقتاستىق جوسپارىنا قول قويدى.