پاراللەل
ءانيپانى ورتالىق الاڭدا كوردىم. بالالارىن ەرتىپ الىپتى. جانىنا بارىپ امان-ساۋلىق سۇرايىن دەپ ءبىر وقتالدىم دا كوزىنە تۇسپەي-اق قويعاندى ءجون كوردىم. كۇيەۋى ولگەننەن كەيىن جانارىنان نۇر تايىپ, جاسىپ قالدى بايعۇس ايەل.
بۇدان بىرنەشە جىل بۇرىن عانا وسى جاپاقوۆتاردا ءبارى دە استا-توك ەدى. دۇنيە ويلاماعان جەردەن توڭكەرىلىپ ءتۇستى. قۇدايعا كۇپىرشىلىك جاساپ, قوڭىر تىرلىك كەشكەندەرگە جوعارىدان قاراپ كەلگەن وتباسىن ءبىر-اق كۇندە قايعى باستى. وتاعاسى جۇرەك تالماسىنان و دۇنيەلىك بولدى دا ەشقايدا جۇمىس ىستەپ, ەشكىمنىڭ الدىنا بارىپ كورمەگەن ءانيپا ءۇش بالاسىنىڭ جانىندا شوشايىپ جەسىر قالدى. بۇگىن ولار – جاردەماقىنى ناپاقا عىپ, سونىمەن كۇنەلتىپ وتىرعان تۇرمىسى تومەن وتباسى.
... ءانيپا العاشىندا اينالاسىنداعى تۋىس-تۋعان, تامىر-تانىستاردىڭ ءبارىنىڭ كومەگىنەن باس تارتقان. بۇرق-سارق ەتىپ شامدانعان. وزىنە ار ساناعان. بىراق تاڭنىڭ اتۋى اتەشتىڭ شاقىرۋىنا قارامايدى ەكەن, بارا-بارا تاعدىردىڭ باسقا سالعانىنا ەرىكسىز مويىن ۇسىنعان. كۇنكورىسى جۇتاڭ جاندارمەن جۇمىس ىستەيتىن ينسپەكتور بۇيتە بەرسە جاعدايدىڭ جاقسارمايتىندىعىنا, ەلدەن جينالعان كيىم-كەشەك, تاعى باسقالاردان باس تارتۋعا بولمايتىندىعىنا سەندىرگەن. ال اكەدەن قالعان ازىن-اۋلاق داۋلەتتى بالالارىنىڭ وقۋىنا جاراتۋعا كوندىرگەن. «باسقا تۇسكەن باسپاقشىل» دەگەن, ەكى جىلدان كەيىن ءانيپانىڭ ءوزى قامقورشىلىقپەن اينالىساتىن ۇكىمەتتىك ورىندارعا الاقان جايىپ, كومەك سۇراۋعا ءماجبۇر بولدى. ەندى ول بالالارىن ەرتىپ, اكتسيا بويىنشا جينالعان, كيىلگەن كيىم-كەشەكتەردى تەگىن تاراتاتىن جەرگە ءجيى بارىپ تۇرادى. بالالارىنا جارامدى كيىم تاڭدايدى. بۇرىنعىداي قىسىلىپ-قىمتىرىلمايدى, كوڭىلى دە, ءوزى دە كومپىستەنىپ, كوندىگىپ العان. تاعدىردىڭ تالماۋ جەردەن تيگەن سوققىسىنا قاسقايىپ قارسى تۇرۋ دا – ەرلىك. ءانيپا سونداي ەرلىككە ۇرپاعى ءۇشىن بارىپ وتىر. تىم قارتايىپ, جۇزىنەن نۇر تايىپ تۇرماسا دا ويلاعانى – ءوز قامى ەمەس, بالالارىنىڭ باعى. انالىق اق ارمانى – سولاردىڭ جانارىنا جاس ۇيىرىلتپەۋ. ەل قاتارلى ازامات ەتىپ شىعارۋ.
ءيا, بۇل دۇنيەدە ءبارى دە پاراللەل: تورقالى توي مەن توپىراقتى ءولىم دە, باق پەن سور دا, ءتىپتى جەر باسىپ جۇرگەن پەندەلەردىڭ وزدەرى دە... ەشكىم دە جازمىشتىڭ جازۋىنان قاشىپ قۇتىلمايدى...
* * *
... جاس ارۋداي جاسانىپ تاعى دا ءاز ناۋرىز كەلدى. شاپاعات پەن ماحاببات, مەيىرىم ايى. وسى ايدا جاسالعان جاقسىلىقتىڭ مىڭ مارتە قايتارىمى بولادى دەسەدى. قۇراندا دا, ىنجىلدە دە سولاي دەلىنگەن.
جۇماعازى يگىسىن