الداعى اپتادا ەلىمىزدە جوعارى دەڭگەيدەگى ديپلوماتيالىق كەلىسسوزدەر مەن وڭىرلىك ماڭىزى بار حالىقارالىق فورۋمدار ۇيىمداستىرىلادى. ساياسي سەرىكتەستىكتى نىعايتۋ, ەكولوگيالىق قاۋىپسىزدىك جانە وڭىرلىك ىنتىماقتاستىقتى كەڭەيتۋ ماسەلەلەرى تالقىلانادى, دەپ جازادى Egemen.kz.
اقوردانىڭ ءباسپاسوز قىزمەتىنىڭ مالىمدەۋىنشە, 20-23 ءساۋىر كۇندەرى پرەزيدەنت قاسىم-جومارت توقاەۆتىڭ شاقىرۋىمەن موڭعوليا پرەزيدەنتى ۋحنااگين حۋرەلسۇح قازاقستانعا مەملەكەتتىك ساپارمەن كەلەدى.
جوعارى دەڭگەيدەگى كەلىسسوزدەر بارىسىندا ەكى ەل اراسىنداعى ساياسي, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى دامىتۋ پەرسپەكتيۆالارى قارالادى. كەزدەسۋلەر ناتيجەسىندە ەكىجاقتى قاتىناستاردى جاڭا دەڭگەيگە كوتەرۋگە باعىتتالعان بىرقاتار شەشىم قابىلدانۋى مۇمكىن.
پرەزيدەنت «ياللا» ءانسامبلىنىڭ كوركەمدىك جەتەكشىسى فاررۋح زاكيروۆكە قۇتتىقتاۋ جەدەلحاتىن جولدادى
22-24 ءساۋىر ارالىعىندا استانادا وڭىرلىك ەكولوگيالىق سامميت (#RES2026) وتەدى. بۇل – بۇۇ اياسىندا قۇرىلعان جاڭا ديالوگ الاڭى.
ءسامميتتىڭ نەگىزگى ماقساتى – ورتالىق ازيانىڭ ورنىقتى دامۋىنا ورتاق كوزقاراس قالىپتاستىرۋ, سونداي-اق كليماتتىق جانە ەكولوگيالىق سىن-قاتەرلەردى ەڭسەرۋ بويىنشا بىرلەسكەن شەشىمدەر ازىرلەۋ. جيىنعا بىرقاتار مەملەكەت پەن ۇكىمەت باسشىلارى, سونداي-اق حالىقارالىق ۇيىمداردىڭ جەتەكشىلەرى قاتىسادى.
پرەزيدەنت بىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى
سونىمەن قاتار 22 ءساۋىر كۇنى پرەزيدەنت قاسىم-جومارت توقاەۆتىڭ توراعالىعىمەن حالىقارالىق ارالدى قۇتقارۋ قورىنىڭ قۇرىلتايشى مەملەكەتتەر باسشىلارى كەڭەسى وتەدى.
كەڭەس بارىسىندا ارال تەڭىزى ايماعىنداعى ەكولوگيالىق احۋالدى جاقسارتۋ, سۋ رەسۋرستارىن ءتيىمدى باسقارۋ جانە ءوڭىر ەلدەرىنىڭ بىرلەسكەن ەكولوگيالىق باستامالارىن كۇشەيتۋ ماسەلەلەرى تالقىلانباق.