ەلىمىزدە ءىرى تسيفرلىق ينفراقۇرىلىم قالىپتاستىرۋعا باعىتتالعان «دەرەكتەردى وڭدەۋ ورتالىقتارى القابى» جوباسىن ىسكە اسىرۋ قارقىن الدى. جوبا اياسىندا ينۆەستورلار تارتۋ, ەنەرگەتيكالىق بازا قۇرۋ جانە ارنايى جەڭىلدىكتەر ەنگىزۋ جۇمىستارى جۇرگىزىلىپ جاتىر, دەپ حابارلايدى Egemen.kz.
جيىندا پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ, ەنەرگەتيكا ءمينيسترى ەرلان اقكەنجەنوۆ, پاۆلودار وبلىسىنىڭ اكىمى اسايىن بايحانوۆ, «قازاقتەلەكوم» اق باسقارما توراعاسى باعدات مۋسين اتقارىلىپ جاتقان جۇمىستار تۋرالى باياندادى.
ۇكىمەتتىڭ ءباسپاسوز قىزمەتىنىڭ مالىمدەۋىنشە, پاۆلودار وبلىسىنىڭ ەكىباستۇز قالاسىندا جوبانى ىسكە اسىرۋ اياسىندا جەر ۋچاسكەلەرى انىقتالىپ, نەگىزگى كەلىسىمدەر جاسالدى. سونىمەن قاتار قۋاتى 215 مۆت بولاتىن قوسالقى ستانسا ساتىپ الىندى, بۇل جوبانىڭ ەنەرگەتيكالىق ينفراقۇرىلىمىنىڭ نەگىزىن قالىپتاستىرادى.
كەڭەس بارىسىندا ينۆەستورلار ءۇشىن قولايلى ورتا قالىپتاستىرۋ ماقساتىندا ەنەرگيامەن جابدىقتاۋدىڭ جەڭىلدەتىلگەن تاريفتىك مودەلى بەكىتىلىپ, ءتيىستى ينۆەستيتسيالىق جانە سالىقتىق پرەفەرەنتسيالار بەلگىلەندى.
ەكىباستۇز گرەس-3 ستانتسياسى سالىنادى: ەلدىڭ ەلەكتر ەنەرگيا ءوندىرىسى ۇلعايادى
باعدات ءمۋسيننىڭ ايتۋىنشا, جوباعا حالىقارالىق تەحنولوگيالىق جانە ينۆەستيتسيالىق كومپانيالاردى تارتۋ بويىنشا جۇمىستار جالعاسىپ جاتىر. اتاپ ايتقاندا, اقش, قىتاي جانە ءۇندىستان ەلدەرىنەن 20-دان استام hyperscale-كومپانيامەن كەلىسسوزدەر جۇرگىزىلگەن. بۇل كومپانيالار «بۇلتتى» ەسەپتەۋ, ۇلكەن دەرەكتەردى وڭدەۋ جانە جاساندى ينتەللەكت سالالارىندا جۇمىس ىستەيدى.
كەلىسسوزدەر ناتيجەسىندە 100 مۆت-تان جوعارى قۋاتقا الدىن الا سۇرانىس قالىپتاستى. ال جوبانىڭ جالپى الەۋەتى 1 گۆت-قا دەيىن جەتىپ, ءىرى «زاكىرلىك» كليەنتتەردى ورنالاستىرۋعا مۇمكىندىك بەرەدى.
جالپى العاندا, «دەرەكتەردى وڭدەۋ ورتالىقتارى القابى» جوباسى قازاقستاندا ءىرى وڭىرلىك تسيفرلىق حاب قالىپتاستىرۋعا جانە الەمدىك جەتەكشى تەحنولوگيالىق كومپانيالاردى تارتۋعا باعىتتالعان.
پرەمەر-مينيستر قاجەتتى نورماتيۆتىك شەشىمدەردى جەدەل قابىلداۋدى جانە جوبانىڭ بارلىق كەزەڭدەرىنىڭ بەلگىلەنگەن مەرزىمدە ورىندالۋىن قامتاماسىز ەتۋدى تاپسىردى.
ەكىباستۇز مونوقالا ساناتىنان شىعارىلدى