وتكەن اپتادا اتىراۋ وبلىستىق پەريناتالدىق ورتالىعىنىڭ باسشىسى قاماۋعا الىندى. العاشىندا لاۋازىمدىق وكىلەتتىلىگىن اسىرا پايدالاندى جانە سىبايلاس جەمقورلىققا جول بەردى دەگەن كۇدىككە ىلىنگەن باس دارىگەرگە قاتىستى كەيىن تاعى ءبىر دەرەك شىقتى.
29 قىركۇيەكتە دۇنيەگە كەلگەن نارەستە تىرشىلىك بەلگىسىن بىلدىرمەگەندىكتەن, دارىگەرلەر «بالانىڭ ءولى تۋعانى» تۋرالى انىقتاما جازىپ, دەنەسىن توڭازىتقىشقا جىبەرگەن. ال ءبىراز ۋاقىتتان سوڭ ءسابيدىڭ ءتىرى ەكەنى انىقتالادى, بىراق اق حالاتتىلار ونى توڭازىتقىشتان شىعارماعان. سەبەپ, الدە سىلتاۋ: «بازاعا ەنگىزىلگەن مالىمەتتى دۇرىستاۋ مۇمكىن ەمەس». ارنايى جەدەل ىزدەستىرۋ شاراسىندا انىقتالعان بۇل جايت تۋرالى سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى شىڭعىس قابدولا مالىمدەدى. ماسەلەگە پىكىر بىلدىرگەن دەنساۋلىق ساقتاۋ ءمينيسترى اتىراۋ وبلىستىق دەنساۋلىق ساقتاۋ باسقارماسىنىڭ باسشىسىن جۇمىستان شىعارۋدى ۇسىندى. الايدا مينيسترلىك پەن اكىمدىك تاراپىنان اتالعان باسقارمانىڭ قىزمەتىنە ساراپتاما جۇرگىزىلىپ, ناتيجەسىندە مانشۇك ايمۇرزيەۆا لاۋازىمىندا قالاتىنى تۋرالى شەشىم شىعارىلدى. ال 7 قازان كۇنى وبلىستىق پەريناتالدىق ورتالىقتىڭ 31 قىزمەتكەرى جۇمىستان بوساتۋعا ءوتىنىش جازدى. وبلىس اكىمىنىڭ ءباسپاسوز حاتشىسى سەرىكجان ەرمەنتاەۆتىڭ ايتۋىنشا, قازىر دارىگەرلەر قىزمەت ورىندارىندا, ولارمەن دەنساۋلىق ساقتاۋ باسقارماسىنىڭ, مينيسترلىكتىڭ جانە كاسىپوداق ۇيىمدارىنىڭ وكىلدەرى جۇمىس جۇرگىزىپ جاتىر. ايماققا دەنساۋلىق ساقتاۋ ۆيتسە-ءمينيسترى ءلاززات اقتاەۆا باستاعان رەسپۋبليكالىق مەكەمەلەردىڭ جەتەكشى ماماندارى كەلدى. ءمينيستردىڭ ورىنباسارى وبلىستىق, قالالىق پەريناتالدىق ورتالىقتاردىڭ قىزمەتىمەن تانىسىپ, دارىگەرلەرمەن سويلەستى جانە بىرقاتار ناقتى تاپسىرمالار بەردى.
ارينە, قيىن جاعداي قالىپتاسسا دا, مۇنايلى وڭىردەگى مەديتسينا سالاسىنىڭ احۋالى تىم مۇشكىل دەۋگە دە بولمايدى. جىل باسىنان بەرى قالالىق پەرزەنتحانانى ەكىنشى دەڭگەيدەن ءۇشىنشى دەڭگەيگە اۋىستىرۋ شارالارى قولعا الىندى. «بوساندىرۋدى ۇيىمداستىرۋعا باعىتتالعان جوسپارلى شارا اياسىندا وبلىستىق پەريناتالدىق ورتالىقتان انەستەزيولوگ-رەانيماتولوگ اۋىستىرىلدى, ەكى نەوناتولوگ كەلدى, ءبارى دە تاجىريبەلى, ەڭبەك وتىلدەرى بار ماماندار. اتالعان اۋرۋحاناعا اقتوبە وبلىسىنان تاعى ەكى مامان-نەوناتولوگ كەلەدى. قالالىق پەريناتالدىق ورتالىق 100%-عا جابدىقتالعان, –دەيدى مانشۇك ايمۇرزيەۆا. – مەكەمە اۋىر دەرتتەرى بار جۇكتى ايەلدەرگە بوساندىرۋ بويىنشا ساپالى مەديتسينالىق قىزمەت كورسەتۋگە دايىن».
باسقارما باسشىسى وبلىستىق پەريناتالدىق ورتالىقتىڭ دا جۇمىسى كۇشەيتىلەتىنىن ايتادى. جۇمىستان كەتكەن دارىگەرلەردىڭ ورنىنا اتىراۋدان, ەلىمىزدىڭ باسقا دا ايماقتارىنان ماماندار شاقىرىلادى. قازىر وڭىردە بالا ءولىمىن ازايتۋ بويىنشا جوسپارلانعان شارالاردىڭ ورىندالۋىن باقىلايتىن مونيتورينگ توبى جۇمىس ىستەپ جاتىر. «اتىراۋ وبلىسىندا بالا ءولىمىنىڭ كوبەيۋى تامىز ايىندا بايقالدى. جىل سايىن ەلىمىزدە 2,5 مىڭ بالا ءولىمى تىركەلەدى», دەدى مينيستر ەلجان ءبىرتانوۆ ۇكىمەت وتىرىسىندا.
ستاتيستيكاعا سۇيەنسەك, رەسپۋبليكا بويىنشا اتىراۋ وبلىسىنداعى بالا ءولىمىنىڭ كورسەتكىشى ورتاشا دەڭگەيدە. سونىڭ وزىندە سوڭعى ەكى ايدا 40 نارەستە شەتىنەدى. بۇل 40 ءۇيدىڭ عانا قايعىسى ەمەس...
اتىراۋ