داريعا نازارباەۆا: حالىقپەن جۇمىستا اتۇستىلىك پەن سالعىرتتىقتان ارىلۋ كەرەك

سەنات باسشىسى دەپۋتاتتاردى ءماسليحاتتاردىڭ قۇرىلعانىنا 25 جىل تولۋىمەن قۇتتىقتادى. داريعا نازارباەۆانىڭ ايتۋىنشا, وكىلدى ورگاندار جەرگىلىكتى مەملەكەتتىك باسقارۋ جۇيەسىندە اسا ماڭىزدى ءرول اتقارادى.

سەناتتا ايماقتارمەن ىنتىماقتاستىقتى ارتتىرۋعا ارنالعان جەرگىلىكتى وكىلدى ورگاندارمەن ءوزارا ءىس-قيمىل جونىندەگى كەڭەس جۇمىس ىستەيدى. سەنات ء ماسليحاتتاردىڭ ءرولىن ودان ءارى نىعايتۋ جانە ءماسليحات حاتشىسىنىڭ مارتەبەسىن ارتتىرۋ, سونداي-اق بوساتىلعان نەگىزدە قىزمەت اتقاراتىن دەپۋتاتتار ينستيتۋتىن ەنگىزۋ جونىندە ۇكىمەتكە ۇسىنىستار توپتاماسىن ازىرلەدى. ونىڭ ءبارى «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭعا تۇزەتۋلەردە كورىنىس تاپتى. داريعا نازارباەۆا ءماسليحات دەپۋتاتتارىن قۇجاتتى بەلسەندى تۇردە تالقىلاۋعا شاقىردى.

سەنات توراعاسى ءماسليحات جانىنداعى قوعامدىق كەڭەس مۇشەلەرىمەن كەزدەسۋدە ولاردىڭ جۇمىسىنىڭ دەربەستىگىن ارتتىرۋ قاجەتتىگىن اتاپ ءوتتى.

ء«بىز سەناتتىڭ جانىندا جەرگىلىكتى وكىلدى ورگاندارمەن ءوزارا ءىس-قيمىل جونىندەگى كەڭەس قۇردىق جانە وعان زور ءۇمىت ارتىپ وتىرمىز. ماسليحاتپەن بايلانىس تىعىز ءارى بەلسەندى جانە ەكىجاقتى بولعانىن قالار ەدىك», - دەپ اتاپ ءوتتى داريعا نازارباەۆا.

سەنات باسشىسىنىڭ پىكىرىنشە, حالىقپەن جۇمىس جاساۋدىڭ جاڭا تۇرپاتى كەرەك بولادى, جۇرتشىلىقتىڭ قاتىسۋىمەن كوشپەلى وتىرىستاردى ۇزدىكسىز وتكىزىپ, جاسالعان جۇمىستار تۋرالى رەسمي سايتتاردا عانا ەمەس, الەۋمەتتىك جەلىلەردە دە كەڭىنەن جاريالاۋ قاجەت. داريعا نازارباەۆا بۇل رەتتە وسى جۇمىستار ءاتۇستى جاسالماي ءارى ءسوز جۇزىندە قالماي, ناقتى مازمۇنعا يە بولۋى كەرەكتىگىن اتاپ ءوتتى.

داريعا نازارباەۆا ۇلتتىق مادەني ورتالىقتار باسشىلارىمەن سول كۇنگى بولعان كەزدەسۋدە ايماقتارداعى اسسامبلەيالاردىڭ مارتەبەسىن نىعايتۋدى, اتاپ ايتقاندا جاستاردى مادەني ورتالىقتار جۇمىسىنا تارتۋ, سونداي-اق ءتۇرلى ۇلت وكىلدەرى ءۇشىن الەۋمەتتىك ليفت جۇيەسىن قۇرۋ ماسەلەلەرىن تالقىلادى.