«Qazaqstan Jastar Fest» – جاستار جىلىنا ارنالعان جوبا. مادەنيەت جانە سپورت مينيسترلىگى قولعا العان باستاما اياسىندا «Atyrau Jastar Fest» سپورتتىق فەستيۆالى جايىق جاعاسىندا ءتورت كۇن بويى سالتانات قۇردى. اتىراۋدىڭ ۇلكەن-كىشىسى اسىعا كۇتكەن ايتۋلى شاراعا الەمدىك سپورت جۇلدىزدارى كەلىپ قاتىستى.
بۇقارالىق سپورتتى دامىتۋدى ماقسات ەتكەن شارا باعدارلاماسى جان-جاقتىلىعىمەن دە ەرەكشەلەنەدى. بەلگىلى سپورت ماماندارى جەرگىلىكتى جاستارعا شەبەرلىك ساعاتتارىن وتكىزسە, GFC 17 حالىقارالىق تۋرنيرىندە ءتۇرلى سايىستار ۇيىمداستىرىلدى. الەمگە ايگىلى جەكپە-جەك شەبەرلەرى حابيب نۋرماگومەدوۆ, ابدۋلماناپ نۋرماگومەدوۆ, يسلام ماحاچەۆ, زابايرا تۋحۋگوۆ, وليمپيادا چەمپيوندارى رومان ۆلاسوۆ, تاگير حايبۋللاەۆتاردى اتىراۋلىقتار قۇرمەتپەن قارسى الدى. قازاقستاندىق تانىمال سپورتشىلار سەرىك ساپيەۆ, ماكسيم راكوۆ, سەرگەي موروزوۆ, دامير يسماگۋلوۆ, بەكزات نۇرداۋلەتوۆ, ابىلايحان ءجۇسىپوۆ, شاۆحات راحمونوۆتار دا فەستيۆال قوناقتارى بولدى.
جاس سپورتشىلارعا ەركىن كۇرەستەن كسرو سپورت شەبەرى, رەسەي فەدەراتسياسىنا ەڭبەگى سىڭگەن جاتتىقتىرۋشى ابدۋلماناپ نۋرماگومەدوۆ شەبەرلىك ساعاتىن وتكىزدى. سپورتتىڭ دزيۋدو, سامبو, ەركىن كۇرەس, دجيۋ-دجيتسۋ, گرەپپلينگ تۇرلەرى بويىنشا وبلىس قۇراماسىنىڭ مۇشەلەرى 18 الەم چەمپيونىن دايىنداپ شىعارعان بەلگىلى باپكەردەن اقىل-كەڭەستەر الدى. «قازاق جاستارىنىڭ سپورتقا دەگەن قۇلشىنىستارى مىقتى ەكەنىن كورىپ, قۋاندىم. سپورت جاقسى دامىعان. مەملەكەت تاراپىنان ۇلكەن قولداۋ بار, وتە تالانتتى جاستار بار, باپكەرلىك قۇرامنىڭ دا دەڭگەيى جوعارى», دەدى ابدۋلماناپ نۋرماگومەدوۆ.
GFC – 17 تۋرنيرىنە قاتىسقان اتىراۋلىق سپورتشىلار ابىلاي تولەش, جۇماگەلدى جالعاس ۇلى, داۋرەن ەرمەكوۆ, تالعات جۇماعاليەۆ, نۇربەرگەن شاريپوۆتار بولاشاقتارىنان ءۇمىت كۇتتىرەتىن جاستار ەكەندىكتەرىن كورسەتتى. ال مۋاي-تايدان دوداعا تۇسكەن جەرگىلىكتى سپورتشى ءابىل عاليەۆ تايلىق كارسىلاسىن جەڭىپ, Jayynger چەمپيوندىق بەلبەۋىنىڭ يەگەرى اتاندى.
ارالاس جەكپە-جەك بويىنشا «Gorilla Fighting Champioship 17» الەمدىك ءتۋرنيرى – فەستيۆالدىڭ ەڭ ماڭىزدى وقيعاسى رەتىندە ۇمىتىلماس اسەر سىيلادى.
– جاستار اراسىندا سپورتتى ناسيحاتتاۋدا وسىنداي شارالاردىڭ ماڭىزى زور, – دەدى ءتۋرنيردىڭ اشىلۋ سالتاناتىندا وبلىس اكىمى نۇرلان نوعاەۆ. – سەگىز ەلدەن ەڭ مىقتى, ەڭ ۇزدىك دەگەن سپورتشىلار قاتىستى. ءوڭىر تۇرعىندارى قىزىقتى دا تارتىستى ويىندارعا كۋا بولدى. وسكەلەڭ ۇرپاقتى جىگەرلى بولۋعا, تالماي تالاپتانۋعا, جەڭىسكە جەتۋگە باۋليتىن, ىنتالاندىراتىن جوبالاردىڭ قاتارى كوبەيە بەرسىن.
سپورت فەستيۆالى وبلىس ورتالىعىنداعى يساتاي-ماحامبەت الاڭىندا كونتسەرتتىك باعدارلامامەن قورىتىندىلاندى. بۇقارالىق سپورت تۇرلەرىنەن دە سايىستار ۇيىمداستىرىلىپ, جەڭىمپازدار انىقتالدى. شارانىڭ قۇرمەتتى قوناعى – UFC چەمپيونى حابيب نۋرماگومەدوۆ: «بىزگە بىرنەشە جىل بويى اتىراۋدان كەلىپ, بىرگە جاتتىعىپ جۇرگەن سپورتشىلار بار. جالپى, قازاقستاندا سپورتقا دەگەن, سونىڭ ىشىندە سپورتتىڭ جاۋىنگەرلىك تۇرىنە دەگەن ۇلكەن ىنتا بايقالادى», دەپ اتاپ ءوتتى.
سونداي-اق فەستيۆالدىڭ سوڭعى كۇنىندە نۇرسايا شاعىن اۋدانىندا ۆەلوورتالىق اشىلدى. قازىردىڭ وزىندە ۆەلوسپورت سەكتسياسىنا 40-قا جۋىق بالا قابىلدانعان. بۇقارالىق سپورتتى دامىتۋعا باعىتتالعان شارالار ءالى تالاي جەڭىستەرگە جول اشارى انىق.
اتىراۋ