بۇگىن بەيبىت اتامقۇلوۆ ءبىرىنشى رەسپۋبليكالىق ەكولوگيالىق ساعات اياسىندا نۇر-سۇلتان قالاسىنداعى №75 مەكتەپ-گيمنازياسىنا باردى. وندا بيولوگيا پانىنەن اعىلشىن تىلىندە وتكەن «قورشاعان ورتانىڭ لاستانۋى» اتتى اشىق ساباققا قاتىستى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
- «تابيعاتتى قورعاۋ – شەكارالارمەن شەكتەلمەيتىن ءىس-شارا. بۇگىنگى ەكولوگيالىق ساعات ارقايسىمىزدىڭ قورشاعان ورتانىڭ جاي-كۇيى ءۇشىن ءوزىنىڭ جەكە جاۋاپكەرشىلىگى تۋرالى ويلانۋعا, كۇن سايىن تابيعات بايلىقتارىن ساقتاۋ ءۇشىن ەڭبەك ەتىپ جۇرگەندەردىڭ, سونداي-اق ءوز باستاماسى بويىنشا ماڭىزدى جانە قاجەتتى ىستەردى جاساعانداردىڭ ەڭبەگىن ەسكە الۋعا سەبەپ بولاتىنىنا سەنىمدىمىن. سىزدەر دە قورشاعان ورتاعا, ورتاق ۇيگە ۇقىپتى قاراۋ پروتسەسىنە بەلسەندى قاتىساتىندارىڭىزعا سەنىمدىمىن, ءبىز ءۇشىن «تابيعاتتى قورعاۋ - وتانىمىزدى قورعاۋ», - دەپ اتاپ ءوتتى ءوز سوزىندە ۆەدومستۆو باسشىسى.
مينيستر سونداي-اق وسى باعىتتا ماكۋلاتۋرا جيناۋدىڭ ماڭىزدىلىعىن اتاپ ءوتتى. ويتكەنى, 1 توننا ماكۋلاتۋرا 10 اعاشتى كەسۋدەن قۇتقارادى.
- مىسالى, بىزدە مينيسترلىكتە 2016 جىلدىڭ سوڭىنا قاراي بولەك قوقىس جيناۋ ەنگىزىلدى. قاعاز قالدىقتارى جەكە جينالادى جانە ماكۋلاتۋرا رەتىندە شىعارىلادى, 3 جىل ىشىندە شامامەن 30 توننا ماكۋلاتۋرا جينالدى, قوقىستى (قتق) شىعارۋ 2 ەسەگە قىسقاردى. تەك ءبىزدىڭ كۇش-جىگەرىمىزدى بىرىكتىرە وتىرىپ, ءبىز بولاشاق ۇرپاق ءۇشىن قازاقستاننىڭ جانە بۇكىل الەمنىڭ تابيعي بايلىقتارىن ساقتاي الامىز! - دەدى بەيبىت اتامقۇلوۆ.
مەكتەپتىڭ يننوۆاتسيالىق بلوگى بويىنشا ەكسكۋرسيادان كەيىن مينيستر اعاش وتىرعىزۋعا قاتىستى.