الەۋمەتتىك سالا مينيسترلەرى سەناتورلارعا جاڭا زاڭ جوبالارىنىڭ ازىرلىگى تۋرالى حاباردار ەتتى

كەزدەسۋدە ءسوز العان پرەمەر-ءمينيستردىڭ ورىنباسارى بەردىبەك ساپارباەۆ پارلامەنتكە الەۋمەتتىك سالاعا قاتىستى 9 زاڭ جوباسى مەن 4 ىلەسپە قۇجات تۇسكەنىن حابارلادى. ولار ەلباسى ن.نازارباەۆتىڭ جانە قازاقستان پرەزيدەنتى ق.توقاەۆتىڭ تاپسىرمالارىن جۇزەگە اسىرۋ اياسىندا ازىرلەندى.

ب.ساپارباەۆ پارلامەنتكە ەنگىزىلەتىن زاڭ جوبالارىنىڭ ساپاسىن ارتتىرۋ – باستى مىندەت ەكەنىن اتاپ ءوتتى. سەناتتا دەپۋتاتتار وسى ماسەلەگە قاتىستى بىرنەشە مارتە سىن ايتقان بولاتىن. ۇكىمەت بۇل ماسەلەنى تۇسىنەدى جانە ونى شەشۋگە ءازىر.

اقپارات جانە قوعامدىق دامۋ ءمينيسترى داۋرەن اباەۆ, ءبىلىم جانە عىلىم ءمينيسترى اسحات ايماعامبەتوۆ, دەنساۋلىق ساقتاۋ ءمينيسترى ەلجان ءبىرتانوۆ, ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ, مادەنيەت جانە سپورت ءمينيسترى اقتوتى رايىمقۇلوۆا ناقتى زاڭ جوبالارى, ولاردى قابىلداۋدان كۇتىلەتىن ناتيجەلەر جانە حالىقپەن ءتۇسىندىرۋ جۇمىستارى تۋرالى حاباردار ەتتى.

سەناتتىڭ تۇراقتى كوميتەتتەرىنىڭ توراعالارى ءار زاڭ جوباسى بويىنشا ەسكەرتۋلەر مەن ۇسىنىستار ايتتى. 

سەنات باسشىسى د.نازارباەۆا مەديا قوعامداستىقپەن بىرلەسىپ وتاندىق بۇقارالىق اقپارات قۇرالدارىن قولداۋدىڭ سالالىق باعدارلاماسىن ازىرلەۋدى ۇسىندى.

ء«داستۇرلى مەدياعا دەگەن كوزقاراستى تۇبەگەيلى قايتا قاراۋ كەرەك. بۇل - تەلەديدار, راديوستانتسيالار, گازەتتەر, ينتەرنەتتەگى بۇقارالىق اقپارات قۇرالدارى. بۇل مەملەكەتتىك ساياسات تۇرعىسىنان وتە ماڭىزدى ءارى ماسەلەنى جان-جاقتى پىسىقتاۋ قاجەت», - دەدى سەنات توراعاسى.

داريعا نازارباەۆا «جاستار جىلىنىڭ» قورىتىندىسى مەن 2020 جىلى «ەرىكتىلەر جىلىن» وتكىزۋ جوسپارى بويىنشا جاۋاپتى مينيسترلىكتەردىڭ اقپاراتىن تىڭداۋدى ۇسىندى.

مينيسترلەرمەن كەزدەسۋدى قورىتىندىلاي كەلىپ, بيۋرو مۇشەلەرى سەناتقا تۇسكەنگە دەيىن ماڭىزدى زاڭ جوبالارىنىڭ تۇجىرىمداماسىن تالقىلاۋعا مۇمكىندىك بەرەتىن ءوزارا ءىس-قيمىلدىڭ وسىنداي ناتيجەلى سيپاتىن اتاپ ءوتتى.

ۆيتسە-پرەمەر ب.ساپارباەۆ سەناتورلارعا بىرلەسكەن جۇمىسى ءۇشىن العىسىن ءبىلدىرىپ, اشىق ۇنقاتىسۋعا دايىن ەكەنىن جەتكىزدى.