الماتىدا زاماناۋي كانادالىق قىلقالام شەبەرى مايكل كلوۋزدىڭ «ونەر – ىزگىلىك جولىندا» دەپ اتالعان سۋرەت كورمەسى اشىلدى. ءا.قاستەەۆ اتىنداعى ونەر مۋزەيىنىڭ قابىرعاسىندا سالتانات قۇرعان ەكسپوزيتسياعا اۆتوردىڭ 90-عا جۋىق تۋىندىسى قويىلعان.
شىعۋ تەگى ماكەدونيالىق مايكل كلوۋز – حالىقارالىق ارت-قاۋىمداستىقتا مويىندالعان شەبەر. جالپى العاندا, ول اقش, بەلگيا, يتاليا, بولگاريا, فرانتسيا, گەرمانيا, تۇركيا, مىسىر, يسلانديا, رۋمىنيا, ماكەدونيا, رەسەي جانە تاعى باسقا ءتۇرلى ەلدەردە 130 جەكە كوركەمسۋرەت كورمەسىن وتكىزگەن.
مايكلدىڭ باسقا ونەر يەلەرىنە ۇقسامايتىن ءبىر ەرەكشەلىگى بار. الەمنىڭ ءار قيىرىندا ءوزىنىڭ سۋرەت كورمەلەرىن ۇزبەي وتكىزەتىن ول تۋىندىلارىن كورمەنى تاماشالاۋعا كەلگەن كوڭىلى اۋعان ادامعا نەمەسە مۋزەي ۇجىمىنا تەگىن سىيعا تارتادى. «ونەر – ىزگىلىك جولىندا» دەپ اتالاتىن بۇل جوبا دا اۆتوردىڭ سول ءداستۇرلى كورمەلەرىنىڭ كەزەكتى جالعاسى. ونىڭ باستى يدەياسى – ونەر ەشقانداي قالىپقا سىيمايتىن, ەلدەر مەن ادامداردى گەوساياسي جاعدايىنا نەمەسە ۇلتىنا قاراماستان بىرىكتىرە الاتىن قۋاتتى كۇش ەكەنىن كورسەتۋ. شىعارماشىلىق پەن كاسىبي قىزىعۋشىلىقتىڭ سان ءتۇرلى ۆەكتورىن قاتار ۇستاعان سۋرەتشى ۆيزۋالدىق ونەردەن بولەك, ديزاين, ستسەنوگرافيامەن دە اينالىسادى, تەاتر, كينو جانە تەلەۆيدەنيەدەگى جۇمىستارعا دا, اكتەرلىك شەبەرلىككە دە ارالاسادى. اۆتور ءوزىنىڭ ءبىر سۇحباتىندا قىزمەت-ارەكەتتىڭ ءاربىر ءتۇرى ءبىرىن-ءبىرى تولىقتىرىپ, جارقىراتا تۇسۋگە جول اشاتىنىنا كوز جەتكىزگەنىن جازعان.
مايكل كلوۋزدىڭ اۆتورلىق ءتاسىلى قاراپايىم سۋرەتتەر مەن وبرازعا كوشىرىلگەن ىقشامدىلىقتى تۋدىراتىن تۇستىك ەكسپرەسسيانى, دەكوراتيۆتىك ستيلدەۋ مەن جالپىلاۋدى بىرىكتىرەدى. بارلىق كومپوزيتسيالار ادام تابيعاتىن زەرتتەۋگە جانە كوركەمدىك تاسىلدەر ارقىلى ىزگىلىك كەلبەتىن ىزدەۋگە باعىتتالعان.
– كلوۋز ءوز شىعارماشىلىعىندا ەشتەڭە ارالاسپاعان تازا تۇستەر مەن كونتراستى سۇلبالارعا نەگىزدەلگەن وزىنە ءتان ستيل قالىپتاستىردى. جىلجىمالى يكەمدى سىزىقتار – باستى كەيىپكەرى ادام, ءبىرىنشى كەزەكتە ايەل بولىپ كەلەتىن كومپوزيتسيالاردى قۇرۋدىڭ باستى قۇرالى. ايەلدىڭ ديدارى – سەزىمتال, ويلى دا سۇلۋ, ۇيلەسىمدى ءارى ءوز كەمەلدىگىن بايقاعىش. مايكل كلوۋز اتا-اناسى كاناداعا ەميگراتسياعا كەلگەننەن كەيىن, 1954 جىلى تورونتودا دۇنيەگە كەلدى. مايكلدىڭ ونەرگە دەگەن قۇشتارلىعى بالا كەزىنەن بايقالدى. 1977 جىلى ونتاريوداعى ونەر كوللەدجىن ءبىتىرىپ, رايەرسونداعى پوليتەحنيكالىق ۋنيۆەرسيتەتتىڭ ينتەرەر ديزاينى ماماندىعى بويىنشا ءبىلىم العان ول الەمدىك ونەردە ءوز جولىن قالىپتاستىرعان سۋرەتشى, – دەيدى مۋزەيدىڭ ءباسپاسوز قىزمەتىنىڭ جەتەكشىسى كلارا يساباەۆا.
سوڭعى جىلدارى الەم ەلدەرىنە ساياحاتتاۋدى ومىرلىك داعدىسىنا اينالدىرعان تانىمال تۋىندىگەر كورمە اياقتالۋعا جاقىن كۇندەرى ءوزىنىڭ زايىبىمەن بىرگە قازاقستانعا كەلۋدى جوسپارلاپ وتىرعانىن جەتكىزگەن.
الماتى