بۇگىندە الماتى وبلىسىنىڭ ەنەرگەتيكالىق مۇمكىندىگى ىشكى قۋات نارىعىنداعى سۇرانىستىڭ 60 پايىزىن عانا ورىنداۋعا مۇمكىندىك بەرەدى ەكەن. ال قالعان قاجەتتى قۋات كوزى كورشىلەس جامبىل وبلىسى مەن قىرعىز ەلىنەن ساتىپ الىنادى. قازىر ايماقتا ىشكى ەنەرگيا سۇرانىسىن قامتاماسىز ەتۋگە بايلانىستى جۇمىستار قىزۋ ءجۇرىپ جاتىر. ونىڭ ىشىندە جەتىسۋدىڭ اعىندى وزەندەرىنەن قۋات وندىرەتىن ستانسالار قۇرىلىسى جاندانىپ, كۇن جانە جەل ەنەرگياسىن يگەرۋگە دە قادام جاسالىپ وتىر.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى باسشىسىنىڭ ورىنباسارى نۇرلان شاياحمەتوۆتىڭ ايتۋىنشا, وڭىردە «جاسىل» ەنەرگيا باعدارلاماسىن جۇزەگە اسىرۋ اياسىندا 2025 جىلعا دەيىن بالامالى قۋات كوزىن وندىرەتىن 25 نىسان سالىنىپ, پايدالانۋعا بەرىلەدى ەكەن. بۇل – جەتىسۋ ولكەسىندەگى ەنەرگەتيكالىق سۇرانىستى وتەۋگە ءارى تابيعاتتى قورعاۋعا باعىتتالعان ماڭىزدى قادام.
− بالامالى قۋات كوزىن ءوندىرۋ بويىنشا قاپشاعاي ماڭىنداعى كۇن ەلەكتر ستانساسىنىڭ قۇرىلىسىنان بولەك, الاكول اۋدانىنداعى جوڭعار قاقپاسى اۋماعىندا جەل ەنەرگياسىن يگەرۋ جۇمىستارى قارقىن الدى. بۇل – ناعىز بولاشاقتىڭ ەنەرگياسى, جەمىسىن دە الداعى ۋاقىتتا كورەتىن بولامىز. قازىر وبلىس بويىنشا وندىرىلەتىن ەنەرگيا كوزى 2 ملرد كيلوۆاتت/ساعات بولسا, ونىڭ قالپىنا كەلەتىن رەسۋرستاردان الىناتىنى 38 پايىز شاماسىندا. جوبا جۇزەگە اسقاننان كەيىن بۇل كورسەتكىش ءوسىپ, «جاسىل» ەنەرگيا ءوندىرۋ دە ارتا تۇسەدى دەگەن سەنىم بار, − دەيدى مامان.
جاقىندا قاپشاعاي قالاسىندا «Eneverse Kunkuat» جشس-نىڭ «Nurǵısa 100 مۆت Solar Park Qapshaǵaı» كۇن ەلەكتر ستانساسىنىڭ ءبىرىنشى كەزەڭى ىسكە قوسىلىپ, 100 مەگاۆاتتىق قۋات الىنا باستادى. جۇمىستى جۇزەگە اسىرعان كومپانيا وكىلدەرىنىڭ ايتۋىنشا, قۇنى 27,7 ملرد تەڭگەلىك جوبانى قارجىلاندىرۋعا «قازاقستان دامۋ بانكىنىڭ» قاراجاتى مەن «قدب-ليزينگ» توبىنىڭ قارجىلىق ليزينگى تارتىلدى. ال 10,4 ملرد تەڭگەسى – مەنشىكتى كاپيتال, ياعني نىسانعا سالىنعان ينۆەستيتسيا. ءوز كەزەگىندە كاسىپورىننىڭ ىسكە قوسىلۋىنا جەرگىلىكتى اتقارۋشى بيلىك قولداۋ ءبىلدىرىپ, «بيزنەستىڭ جول كارتاسى – 2020» باعدارلاماسى ارقىلى جوعارى ۆولتتى جەلىلەردىڭ قۇرىلىسىن وبلىستىق بيۋدجەتتەن 233 ملن تەڭگەگە قارجىلاندىرعان.
ەلىمىزدە وتكەن ەكسپو-2017 كورمەسى التەرناتيۆتى ەنەرگەتيكا جوبالارىنىڭ قارقىندى جۇزەگە اسىرىلۋىنا سەرپىن بەردى.
الماتى وبلىسىندا ەلەكتر ەنەرگياسىنىڭ تاپشىلىعى بار. سوندىقتان بۇگىن ىسكە اسىرىلىپ وتىرعان ءىرى جوبانىڭ ماڭىزى زور. بۇل جوبا اينالاسى ءبىر جىلدىڭ ىشىندە ىسكە قوسىلعانىن دا ايتا كەتۋ كەرەك. بۇگىنگى كۇنى رەسپۋبليكادا جەتپىستەن استام ەلەكتر وندىرەتىن نىسان بار. سونىڭ جيىرمادان استامى الماتى وبلىسىندا ورنالاسقان. بۇل سالا جاعىنان وبلىس كوشباسشى سانالادى. قازىرگى كەزدە قازاقستاندا 800 مۆت ەلەكتر قۋاتى جاڭارتىلعان ەنەرگيا كوزدەرىنەن الىنىپ وتىر. سونداي تاعى 5 نىسان اشۋ جوسپارلانعان. وتاندىق بيزنەسمەندەر كۇن ەلەكتر ستانساسىن ىسكە قوسۋعا بار كۇش-جىگەرىن سالدى. ۇكىمەت تاراپىنان دا قاجەتتى قولداۋ شارالارى كورسەتىلدى. وسىنداي جوبالاردىڭ ناتيجەسىندە ەلىمىزدە وندىرىلەتىن ەلەكتر ەنەرگياسىنداعى جەك ۇلەسى 3 پايىزعا, 2030 جىلعا قاراي 10 پايىزعا جەتەدى.
جالپى ىسكە قوسىلعان كۇن ەلەكتر ستانساسىنىڭ «Nurǵısa 100 مۆت Solar Park Qapshaǵaı» دەگەن اتاۋى بەلگىلى كومپوزيتور نۇرعيسا تىلەنديەۆتىڭ قۇرمەتىنە قويىلعان. جوبا جىل سايىن 160 ملن كۆت/ساع ەلەكتر ەنەرگياسىن وندىرەدى. ول اتموسفەراعا سو2 شىعارىندىلارىن جىلىنا 150 مىڭ تونناعا ازايتادى. نىساننىڭ اۋماعى 400 گەكتاردى الىپ جاتسا, جوبانىڭ 1-ءشى كەزەڭى 274 گەكتاردا ورنالاسقان. ستانسادا جالپى سانى 303 مىڭ پانەل ورناتىلادى. نىساننىڭ 1-ءشى كەزەگىنىڭ قۋاتى 100 مۆت بولسا, تولىق قۋاتىنا شىققاندا 150 مۆت ەلەكتر قۋاتىن وندىرەتىن بولادى.
– الماتى وبلىسى ەكونوميكانىڭ بارلىق باعىتىندا جاقسى دامىپ كەلەدى, يندۋستريالدى ايماقتار قۇرىلىپ, جاڭا نىساندار اشىلۋدا. جاڭادان ىسكە قوسىلعان ءىرى كاسىپورىنداردىڭ بارلىعى قولجەتىمدى ەلەكتر قۋاتىن قاجەت ەتەدى. اشىلىپ وتىرعان كۇن ەلەكتر ستانساسى وبلىستى ەلەكتر قۋاتىمەن قامتاماسىز ەتۋگە ۇلەس قوساتىن ماڭىزدى نىسان بولماق. بۇل – سولتۇستىك – وڭتۇستىك ەلەكتر تاراتۋ جەلىسىنىڭ بويىندا تۇرعان ءىرى نىسان. سونىمەن بىرگە جوبانىڭ جۇزەگە اسىرىلۋى جاڭا جۇمىس ورىندارىنىڭ اشىلۋىنا, بيۋدجەتكە سالىق ءتۇسىمىنىڭ جانە وڭىرگە تارتىلعان ينۆەستيتسيا كولەمىنىڭ ارتۋىنا سەپتىگىن تيگىزەدى. ونىڭ ناتيجەسى وبلىس ەكونوميكاسىنا وڭ ىقپال ەتىپ, يگىلىگىن حالىق كورەدى, – دەيدى الماتى وبلىسىنىڭ اكىمى اماندىق باتالوۆ.
ايتپاقشى, كۇن ەلەكتر ستانساسىن سالۋعا 11 وتاندىق مەردىگەر كومپانيا قاتىسقان. ولاردىڭ اراسىندا «امانات», «اسپمك-519», «نازار ەنەردجي», «تەنگيزستروي» جانە باسقا دا كومپانيالار بار. ستانسا قۇرىلىسىن جۇرگىزۋدە جەرگىلىكتى تۇرعىنداردان 500-دەن استام ادام جۇمىس ىستەدى. نىسان ىسكە قوسىلعاندا 35 ادامدى جۇمىسپەن قامتيدى.
الماتى وبلىسى