گازەتىمىزدىڭ وتكەن ساندارىندا ەلوردانىڭ «استانا» كلۋبى مەن اندوررانىڭ «سانتا-كولوما» كەزدەسۋىنىڭ ناتيجەسىن جازعان بولاتىنبىز. سوندىقتان بۇل ويىنعا توقتالماي, «قايرات» پەن «ورداباسىنىڭ» ماتچتارىنا كەڭىرەك شولۋ جاساساق.
«قايراتتىڭ» تاعدىرى قىل ۇستىندە
«قايرات» كومانداسى يزرايلگە جوعارى كوڭىل كۇيمەن اتتانعان-دى. سەبەبى وتكەن اپتادا ءوز الاڭىندا ەۋروپا ليگاسىنىڭ العاشقى ىرىكتەۋىندە «شيروكي-بريەگ» (بوسنيا جانە گەرتسەگوۆينا) كلۋبىن 2:1 ەسەبىمەن جەڭسە, اراعا ەكى-ءۇش كۇن سالىپ ەل چەمپيوناتىنىڭ كەزەكتى تۋرىندا قوستانايعا ساپار شەگىپ, جەرگىلىكتى «توبىل» كومانداسىن 3:5 ەسەبىمەن تاس-تالقانىن شىعاردى.
يزرايلدە وتكەن ويىندا دا الماتىلىق ۇجىمنىڭ جەڭىسكە جەتەتىنىنە ءۇمىتتى بولعانبىز. الايدا ماتچتىڭ العاشقى 10 مينۋتىندا پەنالتيدەن سوعىلعان گول «قايراتتىڭ» ويىنىن مۇلدە باسقا ارناعا بۇرىپ جىبەردى. دەسە دە گول سوعىلعانعا دەيىن ءبىزدىڭ فۋتبولشىلار ءتاپ-ءتاۋىر ونەر كورسەتىپ جاتقان-دى. بىراق ويىن شىرقىن 11 مەترلىك ايىپ دوبى بۇزدى. وسىلايشا كەزدەسۋدىڭ ءبىرىنشى تايمى جەرگىلىكتى «حاپوەل» كلۋبىنىڭ باسىمدىعىمەن ءوتتى.
ۇزىلىستەن كەيىن الەكسەي شپيلەۆسكي شاكىرتتەرى ۇجىم بولىپ العا قاراي ۇمتىلدى. قارسىلاس كوماندانىڭ قاقپاسىنا بىرنەشە قاۋىپتى شابۋىل ۇيىمداستىرىپ, قورعانىستى ۇمىت قالدىرعانداي بولدى. كەزەكتى قارىمتا شابۋىلدىڭ بىرىندە «حاپوەل» ويىنشىسى ەدەن شامير كومانداسىنىڭ ەكىنشى گولىن سوعىپ كەتتى. ەكىنشى تايمعا قوسىلعان قوسىمشا ۋاقىتتا ەلدوس احمەتوۆ مەرگەندىگىمەن كوزگە تۇسكەن ەدى, الايدا تورەشى بۇل ساتتە ويىن ەرەجەسىنىڭ بۇزىلعانىن انىقتاپ, احمەتوۆتىڭ گولىن ەسەپتەمەي قويدى. وسىلايشا «قايرات» سىرت الاڭداعى العاشقى ويىندا 0:2 ەسەبىمەن جەڭىلىسكە ۇشىرادى. قوس كوماندا اراسىنداعى قارىمتا كەزدەسۋى 1 تامىزدا, الماتىدا وتەدى. «قايرات» كەلەسى كەزەڭگە شىعۋ ءۇشىن قارسىلاس كوماندانىڭ قاقپاسىنا جاۋاپسىز ءۇش گول سوعۋعا تۋرا كەلەدى.
«ورداباسى» ءۇشىنشى كەزەڭگە جاقىنداي ءتۇستى
قازاقستاندىق ءۇش كوماندانىڭ ىشىندە قازىر «ورداباسىنىڭ» جاعدايى ءتاۋىر. ويتكەنى چەحيادا وتكەن ويىندا جەرگىلىكتى «ملادا-بولەسلاۆ» كومانداسىنىڭ قاقپاسىنا گول سوعىپ, قارىمتا ماتچ الدىندا ازداعان باسىمدىققا يە بولدى. ال جالپى كەزدەسۋ 1:1 ەسەبىمەن تەڭ اياقتالدى.
ويىنداعى ەسەپتى ءبىرىنشى بولىپ شىمكەنتتىك ۇجىم اشتى. ماتچتىڭ 21-مينۋتىندا «ورداباسىنىڭ» بوسنيالىق جارتىلاي قورعاۋشىسى ميرزاد مەحانوۆيچ گول سوعىپ, كومانداسىن ەسەپتە العا شىعاردى. دەگەنمەن الاڭ يەلەرى ءبىرىنشى تايم اياقتالعانعا دەيىن ەسەپتى تەڭەستىرىپ ۇلگەردى. 45-مينۋتتا «ملادا-بولەسلاۆ» فۋتبولشىسى نيكولاي كومليچەنكو مەرگەندىگىمەن تانىلىپ, ەسەپتى 1:1-گە جەتكىزدى. ەكىنشى تايمدا ەكى كوماندا دا گول سوعۋعا ۇمتىلعانىمەن, دوپ قاقپاعا دارىماي قويدى.
ەندى ەكى كوماندا اراسىنداعى قارىمتا كەزدەسۋ 1 تامىزدا شىمكەنتتەگى قاجىمۇقان اتىنداعى ورتالىق ستاديوندا وتەدى. بۇل ويىندا «ورداباسى» كومانداسىن 0:0 ەسەبى دە كەلەسى كەزەڭگە الىپ شىعادى. بىراق جەڭىستى قولدان شىعارىپ الماس ءۇشىن شىمكەنتتىكتەرگە گول سوققانى ءتيىمدى بولادى.
بولاشاق قارسىلاستاردىڭ ناتيجەسى قانداي؟
«استانا» ەلوردادا وتەتىن جاۋاپتى كەزدەسۋدە «سانتا-كولوما» كلۋبىن جەڭەتىن بولسا, چەمپيوندار ليگاسىندا ويناپ جاتقان «فەرەنتسۆاروش» (ۆەنگريا) – «ۆاللەتتا» (مالتا) جۇبىنىڭ جەڭىلگەن كومانداسىمەن كەزدەسەدى. ەكى كلۋب اراسىنداعى العاشقى ماتچ ۆەنگريادا ءوتىپ, «فەرەنتسۆاروش» 3:1 ەسەبىمەن باسىم تۇسكەن.
«قايرات» – «حاپوەل» جۇبىنىڭ جەڭىمپازى «نوررچەپينگ» (شۆەتسيا) نەمەسە «ليەپايا» (لاتۆيا) كلۋبىمەن كەزدەسەدى. العاشقى كەزدەسۋدە شۆەتسيا كومانداسى 2:0 ەسەبىمەن جەڭىسكە جەتكەن بولاتىن.
شىمكەنتتىك كوماندا ءۇشىنشى ىرىكتەۋ كەزەڭىندە رۋمىنيانىڭ فكسب (بۇرىنعى «ستياۋا») كلۋبىمەن كەزدەسۋى بەك مۇمكىن. ويتكەنى فكسب سىرت الاڭدا ارمەنيانىڭ «الاشكەرت» كومانداسىنان 3:0 ەسەبىمەن باسىم ءتۇستى. ەگەر قازاقستاندىق كوماندالار ءۇشىنشى كەزەڭگە شىعاتىن بولسا, العاشقى ويىنىن 8 تامىزدا ءوز الاڭدارىندا, ال قارىمتا كەزدەسۋلەردى 15 تامىزدا سىرت الاڭدا وتكىزەدى.