«اقمولا وبلىستىق پد قىزمەتكەرلەرى جۇرگىزگەن كەشەندى جەدەل-ىزدەستىرۋ شاراسى بارىسىندا ورمان شارۋاشىلىعىنىڭ قىزمەتكەرلەرىنە شابۋىل جاساعان كۇدىكتىلەر ۇستالدى. ارقالىق قالاسىنىڭ 45 جاستاعى تۇرعىنى مەن ونىڭ 20 جاستاعى بالاسى پوليتسيادان جاسىرىنۋ ماقساتىندا اۆتوكولىكتەن قۇتىلماق بولعان. الايدا, پوليتسيا قىزمەتكەرلەرىنىڭ شيراق قيمىلىنىڭ ارقاسىندا كۇدىكتىلەر قوستاناي وبلىسىنىڭ اۋماعىندا ۇستالدى», - دەپ ءمالىم ەتتى ۆەدومستۆونىڭ ءباسپاسوز قىزمەتىندەگىلەر.
وسىعان دەيىن حابارلاعانىمىزداي, 23 شىلدەدە شامامەن ساعات 11-دە «وحوتزووپروم «ءوب» رمقك ورتالىق وڭىرلىك فيليالىنىڭ ينسپەكتورلارى اقمولا وبلىسى جارقايىڭ اۋدانىندا تابيعاتتى قورعاۋ زاڭناماسىن بۇزعانداردىڭ الدىن الۋ شاراسىن جۇرگىزگەن جانە كيىك اتۋ فاكتىسىن انىقتاعان. زاڭ بۇزۋشىلاردىڭ ىزىنە تۇسكەن ەكى ينسپەكتورعا قارسى وق اتىلعان. سالدارىنان 1976 جىلعى ينسپەكتور كوز جۇمسا, 1975 جىلعى ارىپتەسى جارالانىپ, جارقايىڭ اۋداندىق اۋرحاناعا جاتقىزىلعان ەدى.
وسىعان وراي, ارنايى جەدەل-تەرگەۋ توبى قۇرىلىپ, كۇدىكتىلەردى ۇستاۋ بويىنشا كەشەندى شارالاردى قولعا الدى. كۇدىكتىلەردى ۇستاۋعا جارقايىڭ, ەسىل جانە جاقسى اۋداندارىنىڭ پوليتسيا ءبولىمىنىڭ جەكە قۇرامى تارتىلدى. پاترۋلدىك قىزمەت ناريادىنان كۇدىكتىلەردىڭ كولىگىنە تۇسپالداۋ بەرىلدى. جارقايىڭ جانە كورشى اۋدانداردىڭ اۋماعىندا 10 بلوك بەكەت قويىلعان بولاتىن.
بۇل ءىس قر ىشكى ىستەر ءمينيسترى مەن اقمولا وبلىستىق پد باسشىسى ءوز باقىلاۋىنا الىندى. سونىمەن قاتار, اتالعان وقيعاعا بايلانىستى قر قك 99 بابىنىڭ 1 بولىگى بويىنشا قىلمىستىق ءىس قوزعالعان بولاتىن.