مينيستر, بيىل 1 ساۋىردەن باستاپ مەملەكەتتىك قىزمەتكەرلەردىڭ جالاقىسى ورتا ەسەپپەن 30%-عا ءوسكەنىن جانە ول 1 ميلليوننان استام ادامدى قامتىلعانىن اتاپ ءوتتى. سونداي-اق ول «ەڭبەك» باعدارلاماسى تولىعىمەن ورىندالعانىن ساباقتاي كەلىپ, 400 مىڭنان استام قازاقستاندىق جۇمىسقا تارتىلعانىن ايتتى.
– 14 مىڭ ادامعا شاعىن نەسيە بەرىلىپ, 3 مىڭعا جۋىق ازامات گرانت يەلەندى. مەملەكەت باسشىسىنىڭ تاپسىرماسىنا سايكەس, قازاقستاندىقتاردى ونىڭ ىشىندە الەۋمەتتىك از قامتىلعان ءارى كوپ بالالى وتباسىلاردى, جارىمجان جانداردى قولداپ, جۇمىسپەن قامتۋ ءۇشىن قوسىمشا گرانت بولدىك. بۇگىنگى ناقتىلانعان بيۋدجەت بويىنشا گرانتتاردى 23 مىڭعا كوبەيتەمىز. وعان – 12 ملرد تەڭگە بولىنەدى. ميكرونەسيە 20 ملرد, قىسقا مەرزىمدى وقىتۋعا – 13 ملرد, سونداي-اق «بيزنەس باستاۋ» باعدارلاماسىنا 3 ملرد تەڭگە قاراستىرىلماق. ال وڭتۇستىك ايماقتاردان تۇرعىنداردى سولتۇستىك وڭىرگە كوشىرۋ ءۇشىن قوسىمشا 3 ملرد قاراجات اۋدارىلدى, – دەدى سالا ءمينيسترى.
ەڭبەك داۋلارىنىڭ الدىن الۋ ماقساتىندا جاۋاپتى ۆەدومستۆو ەڭبەك كەلىسىمشارتتارىنىڭ ەلەكتروندى نۇسقاسىن ازىرلەپ جاتىر ەكەن. ب.ساپارباەۆ بۇل كوپتەگەن تۇيتكىلدى پروبلەمالاردى رەتتەۋگە سەپتەسەتىنىنە سەنىمدى.
ەڭبەك جانە حالىقتى الەۋمەتتىك قورعاۋ ءمينيسترى بيزنەستىڭ الەۋمەتتىك جاۋاپكەرشىلىگى شەڭبەرىندە 160 مىڭ وتانداسىمىزعا 37 ملرد تەڭگەنىڭ كولەمىندە كومەك كورسەتىلگەنىن جىپكە ءتىزدى. بۇعان قوسا سپيكەر كوشى-قون ساياساتى دا قارقىندى ءجۇرىپ جاتقانىن, سىرتتاعى قانداستاردى ەلگە قايتارۋ بويىنشا جۇمىستار جالعاسىن تاپقانىن حاباردار ەتتى. بيىل 6 مىڭ قانداسىمىزعا تاريحي وتانىنا ورالۋ باعى بۇيىرىپتى.
سالا باسشىسى ۇستىمىزدەگى جىلى اتاۋلى الەۋمەتتىك كومەكپەن 285,7 مىڭ وتباسى نەمەسە 1,4 ميلليون قازاقستاندىق قامتىلعانىن ناقتىلادى.
– «الەۋمەتتىك قامقورلىق» شاراسى اياسىندا 1 شىلدەدەن باستاپ مۇگەدەك بالالار جانە بالا كەزىنەن ءى توپتاعى مۇگەدەكتىگى بار 18 جاستان اسقان ازاماتتاردى كۇتۋ بويىنشا مەملەكەتتىك جاردەماقىلاردىڭ مولشەرى ارتادى, – دەدى ب.ساپارباەۆ.ول 100 مىڭ ازاماتقا بەرىلەتىن ءجاردەماقىنىڭ مولشەرى 31 183 تەڭگەدەن 41 578 تەڭگەگە دەيىن ۇلعاياتىنىن مالىمدەدى.
جاقسىلىق مۇراتقالي,
«Egemen Qazaqstan»