ءبىلىم جانە عىلىم مينيسترلىگىنىڭ جوعارى وقۋ ورنىنان كەيىنگى ءبىلىم بەرۋ دەپارتامەنتىنىڭ ديرەكتورى ادىلەت تويباەۆ 20 ماۋسىمدا ەلىمىزدە ۇلتتىق بىرىڭعاي تەستىلەۋ باستالعانىن بايانداپ جانە ونىڭ ارالىق ناتيجەلەرىمەن تانىستىردى.
«تەستىلەۋگە ءوتىنىش بەرگەن 74 365 ءبىتىرۋشىنىڭ 71 227-ءسى قاتىستى. بۇل ءوتىنىش بەرگەندەردىڭ 96 پايىزىن قۇرايدى. ونىڭ ىشىندە قازاق تىلىندە 56 684 ءبىتىرۋشى, ورىس تىلىندە – 14 455, اعىلشىن تىلىندە 87 ءبىتىرۋشى تاپسىردى. 24 ماۋسىم كۇنى ەڭ جوعارى ناتيجە – 140 بالعا تۇركىستان وبلىسى سارىاعاش اۋدانىنىڭ تۇلەگى, «التىن بەلگى» يەگەرى جۇباي قاسىمجان ءادىلجان ۇلى قول جەتكىزدى. بۇگىنگە دەيىن ەڭ كوپ تاڭدالعان كومبيناتسيالار: «فيزيكا»+ «ماتەماتيكا». ۇبت-دا ەرەكشە ءبىلىم بەرۋ قاجەتتىلىگى بار 21 بالاعا جەكە اۋديتوريا, كومەكشى, سونداي-اق ىمداۋ ءتىلىن بىلەتىن مامان بەرىلدى. ۇبت وتكىزۋ تەحنولوگياسىنىڭ ساقتالۋىن باقىلاۋدى وڭىرلەرگە جىبەرىلگەن مينيسترلىك وكىلدەرى قامتاماسىز ەتتى. بارلىق اۋديتوريا ۇيالى تەلەفون سيگنالدارىن باساتىن قۇرالدارمەن جانە بەينەكامەرالارمەن جابدىقتالدى. ۇبت وتكىزۋ پۋنكتتەرىندە بەينەترانسلياتسيا كورسەتىلەتىن مونيتورلار ورناتىلىپ, ۇبت-نىڭ ءوتۋ پروتسەسىن باقىلاۋعا جاعدايلار جاسالدى. جوعارى وقۋ ورىندارى وزدەرىنىڭ رەسمي سايتتارى ارقىلى, youtube كانالى ارقىلى ونلاين ترانسلياتسيا جۇرگىزدى», دەگەن ءا.تويباەۆ ۇلتتىق تەستىلەۋ ورتالىعىنىڭ call-ورتالىعىنا 546 قوڭىراۋ كەلىپ تۇسكەنىن تىلگە تيەك ەتتى.
«سونىمەن قاتار مەملەكەتتىك كوميسسيالار ۇبت وتكىزۋ پۋنكتتەرىندە اتا-انالارعا ارنالعان كۇتۋ زالدارىن, مەديتسينا قىزمەتكەرلەرىنىڭ كەزەكشىلىگىن, قوعامدىق ءتارتىپتىڭ جانە قاجەتتى قاۋىپسىزدىك شارالارىنىڭ, ونىڭ ىشىندە ءورت قاۋىپسىزدىگى شارالارىنىڭ قامتاماسىز ەتىلۋىن ۇيىمداستىردى. تەستىلەۋ وتكىزۋ مەرزىمىندە ۇلتتىق تەستىلەۋ ورتالىعىنىڭ call-ورتالىعىنا 546 قوڭىراۋ كەلىپ ءتۇستى. تەستىلەۋ ناتيجەلەرى edu.mail.kz سايتىندا, @EDU.GOV.KZ bot – Telegram bot ارقىلى جانە ۇلتتىق تەستىلەۋ ورتالىعىنىڭ سايتىندا ورنالاستىرىلدى. بۇگىن ساعات 13.00-گە دەيىن جەرگىلىكتى جەرلەردە اپەللياتسيالىق كوميسسيا جۇمىسىن جۇرگىزۋدە. رەسپۋبليكالىق اپەللياتسيالىق كوميسسيا دا ءوز جۇمىسىن باستادى. اتالعان اپەللياتسيالىق كوميسسياعا 111 ءوتىنىش كەلىپ ءتۇستى, ونىڭ 63-ءى قاناعاتتاندىرىلدى. جالپى, ۇبت شتاتتىق رەجىمدە وتۋدە», دەپ ءسوزىن تۇيىندەدى دەپارتامەنت ديرەكتورى.
راۋان قايدار, «Egemen Qazaqstan»