كەي ادامداردا قاناعات دەگەن جوق قوي. وبال-ساۋاپتى دا بىلە بەرمەيدى. قارىن تويدىرعاننان باسقا دا ءىسى جوق. بالىق ۋىلدىرىق شاشار كەزدە اشىق كولگە شىعىپ, پايداعا شىقپاق بولعان ارال اۋدانىنداعى ەكى ازامات زاڭ قۇرىعىنا ءىلىندى. جانۋارلار مەن وسىمدىكتەر الەمىن قورعاۋ بارىسىنداعى رەيد كەزىندە قولعا تۇسكەن ەكەۋدەن 126 كەلى كوكسەركە تاركىلەنگەن.
«اتالعان دەرەك اۋداندىق پروكۋراتۋرادا تىركەلدى. قۇزىرلى ورگاندار تاراپىنان ەكى تۇرعىنعا قر قىلمىستىق كودەكسىنىڭ 335-بابىنىڭ 3-بولىگىمەن سوتقا دەيىنگى تەرگەپ-تەكسەرۋ جۇرگىزىلدى. سوت ۇكىمىمەن اتالعان ازاماتتار تاعىلعان ايىپتار بويىنشا كىنالى دەپ تانىلدى. ارقايسىسىنا 6 اي مەرزىمگە باس بوستاندىعىن شەكتەۋ جازاسى تاعايىندالدى», - قىزىلوردا وبلىستىق پروكۋراتۋراسى وسىلاي دەپ مالىمدەدى.
ەندى ولاردان مەملەكەتكە كەلتىرىلگەن 620 392 تەڭگە كولەمىندەگى زالال وزدەرىنەن وندىرىلەدى. زاڭسىز بالىق اۋلاۋشىلار ايىپپۇلدان بولەك موتورلى قايىعىنان دا ايىرىلىپ تىندى, ياعني تاركىلەندى.
قىزىلوردا وبلىسى.