تاۋەلسىزدىك العان جىلداردان بەرى العاش رەت جاڭا پرەزيدەنت سايلانىپ, قازاقستان رەسپۋبليكاسىنا ادال قىزمەت ەتۋ ءۇشىن انت قابىلداندى. بۇعان دەيىنگى سايلاۋ الدىندا Nur Otan پارتياسى اتىنان ۇسىنىلعان قاسىم-جومارت توقاەۆقا تولىقتاي قولداۋ بىلدىردىك. بۇگىندە ايقىن ءارى باسىم داۋىس جيناپ جەڭىسكە جەتتى. يناۋگۋراتسيا كەزىندە قاسىم-جومارت كەمەل ۇلىنىڭ ۇسىنىسى مەن جوسپارى, كەلەشەككە باستاعان باسىم باعدارلارى قانشالىقتى وزەكتى, ورىندى ەكەنىن ۇعىندىق. سايلانعان العاشقى كۇننەن باستاپ, ءوزىنىڭ ناقتى شەشىمدەر قابىلداۋ ارقىلى باس-اياعى ءبۇتىن جوسپارىمەن, اۋقىمدى دايىندىقپەن كەلگەنىن كورسەتتى. كوپشىلىكتىڭ ەرتەڭگە دەگەن سەنىمى وياندى دەگەن ويدامىن.
پرەزيدەنت ءوز سوزىندە حالىقتى بيلىك پەن قوعام اراسىنداعى قاتىناس الاڭداتاتىنىن ايتتى. سوندىقتان ۇلتتىق قوعامدىق سەنىم كەڭەسىن قۇرۋدى ۇسىندى. كەڭەسكە جاستاردى قوسا العاندا, بۇكىل قوعامنىڭ وكىلدەرى كىرەتىنىن ايتتى. بۇل اسا ماڭىزدى باستاما بولماق. حالىقپەن تىكەلەي بايلانىس ورناتا وتىرىپ, سان سالالى قوعامدىق ماسەلەلەردىڭ وڭ شەشىمىن بىرگە قاراستىرۋ مىندەتى تۇر. بۇل قادام ارقىلى حالىقتىڭ سەنىمى ۇيالايدى, تۇراقتىلىق ورنايدى, بىرلەسكەن ءىستىڭ ناتيجەسى بولادى.
ق.توقاەۆ ەلباسى ن.نازارباەۆتىڭ باستامالارى الداعى ۋاقىتتا دا جالعاسىن تاباتىنىن جەتكىزدى. بۇگىنگە دەيىن ەل دامۋىنىڭ تەتىگى سانالعان قاي سالا بولماسىن اياقتان تۇرىپ, جەمىستى ناتيجەگە قول جەتكىزدىك. سونىڭ ىشىندە ەلدىڭ مادەني-رۋحاني باعىتتاعى باعدارى باعالانىپ, باعى جاندى. سونىمەن قاتار ءبۇگىندە قازاق ەلىنىڭ الەم الدىنداعى بەدەلى مەن ۇستانىمىن بيىك تۇعىردان تۇسىرمەي, كەلەشەك ۇرپاققا اماناتتاۋ, تۇراقتى دامۋ جولىنان تايماۋ مىندەتى تۇر.
نادەجدا گوروبەتس,
قازاقستاننىڭ ەڭبەك سىڭىرگەن قايراتكەرى, اباي اتىنداعى قازاق مەملەكەتتىك اكادەميالىق وپەرا جانە بالەت تەاترى ديرەكتورىنىڭ ورىنباسارى