ەكى كۇن بويى شاراعا قاتىسۋشىلار كونەرگەن كەن ورىنداردى يگەرۋدە كۇن تارتىبىندە تۇرعان ماسەلەلەردى تالقىلاپ, وڭدەۋ جۇمىستارىنىڭ تيىمدىلىگىن ارتتىرۋ ماقساتىندا زاماناۋي تەحنولوگيالاردى دامىتۋ, ەنگىزۋ جانە كەن ورىنداردى تسيفرلىق جۇيەگە كوشىرۋدەگى تاجىريبەلەرىمەن ءبولىستى. كونفەرەنتسيا جۇمىسىنا عىلىمي ينستيتۋتتار, ۋنيۆەرسيتەتتەر, قازاقستان, رەسەي, قىتاي, ءازىربايجان ەلدەرىنىڭ مۇناي-گاز سالاسىنىڭ ماماندارى, سونىمەن قاتار قر ەنەرگەتيكا مينيسترلىگىنىڭ قىزمەتكەرلەرى, ماڭعىستاۋ وبلىسى اكىمدىگى مەن «قازمۇنايگاز» كومپانيالار توبىنىڭ وكىلدەرى قاتىستى.
ۇيىمداستىرىلعان كونفەرەنتسيا جۇمىسىنىڭ اياسىندا «قازمۇنايگازعزجي»-نىڭ جاڭا اكىمشىلىك عيماراتى جانە زەرتحانالىق كورپۋس اشىلدى. سالتاناتتى شاراعا «KAZENERGY» قاۋىمداستىعى توراعاسىنىڭ ورىنباسارى ۇزاقباي قارابالين, ەنەرگەتيكا ءمينيسترىنىڭ ءبىرىنشى ورىنباسارى ماحامبەت دوسمۇحامبەتوۆ, ماڭعىستاۋ وبلىسى اكىمىنىڭ ءبىرىنشى ورىنباسارى ءاليحان قىراۋباەۆ جانە «قازمۇنايگاز» ۇك» اق باسقارما توراعاسىنىڭ ءوندىرىس جونىندەگى ورىنباسارى جاقىپ ماراباەۆ قاتىستى.
- «قازمۇنايگازعزجي» تاريحى ماڭعىستاۋداعى كوپتەگەن مۇناي جانە گاز كەن ورىندارىنىڭ ونەركاسىپتىك وڭدەلۋى, يگەرىلۋى جانە ىسكە قوسىلۋىمەن تىعىز بايلانىستى. كوپتەگەن كەن ورىندارىن اشۋ ءۇشىن عىلىمي-زەرتتەۋ مەن جوبالاۋ-ىزدەۋ جۇمىستارىن جۇرگىزۋ كەرەك بولدى. «قازمۇنايگازعزجي» ۇجىمى سول ماڭىزدى جۇمىستى قازىر دە جالعاستىرىپ كەلە جاتقانى قۋانتادى. مەنىڭ ويىمشا, وسىنداي بارلىق مۇمكىندىك قاراستىرىلعان كەڭسەدە ينستيتۋت ۇجىمى بۇدان دا ۇلكەن جەتكىستىكتەرگە قول جەتكىزەتىنىنە سەنىمدىمىن, دەدى ۇ.قارابالين.
ءوز كەزەگىندە جاقىپ ماراباەۆ ينستيتۋتتىڭ 50 جىلدىعى قازاقستاندىق مۇناي تاريحىمەن تىعىز بايلانىستى ەكەنىن اتاپ ءوتتى. ماڭعىشلاق مۇناي كەن ورىندارىنىڭ اشىلۋىنان بۇگىنگى كۇنگە دەيىن زەرتتەۋ جۇمىستارى جالعاسىپ كەلەدى. ينستيتۋتتىڭ عالىمدارى وسى ۋاقىتقا دەيىن قازاقستاندىق مۇناي قورىن دۇرىس يگەرۋدە ايتارلىقتاي ۇلەس قوسىپ كەلەدى.
جاڭادان بوي كوتەرگەن اكىمشىلىك عيمارات پەن زەرتحانالىق كورپۋس ەكى گەكتار جەردى الىپ جاتىر. زاماناۋي قوندىرعىلارمەن جابدىقتالعان عىلىمي-زەرتحانالىق ورتالىق ەكى بلوكتان تۇرادى: مۇناي ۇلگىسىنىڭ قويماسى جانە زەرتحانا. ال اۋدانى 11 مىڭ شارشى مەتر بولاتىن سەگىز قاباتتى عيماراتتا قىزمەتكەرلەردىڭ ناتيجەلى جۇمىس ىستەۋى ءۇشىن بارلىق جاعداي جاسالعان.
ماڭعىستاۋ وبلىسى