«باتىس» وڭىرلىك قولباسشىلىعىنىڭ ءباسپاسوز قىزمەتىنەن كاپيتان رۋستەم يگيسينوۆتىڭ ايتۋىنشا, بيىلعى جىلى مەملەكەتتىك رامىزدەر كۇنى جاڭا وقۋ كەزەڭىنىڭ باستالۋىمەن تۇسپا-تۇس كەلدى. بۇل كۇنى باتىستىڭ بارلىق اسكەري بولىمدەرىندە سالتاناتتى ميتينگتەر مەن ءىس-شالار ۇيىمداستىرىلدى.
اقتوبە قالاسىنداعى 30238 اسكەري بولىمىندە اسكەري قىزمەتشىلەر دوڭگەلەك ۇستەل وتكىزسە, اقتاۋداعى 25744 جانە اتىراۋداعى 41321 اسكەري بولىمدەرىندە مەملەكەتتىك رامىزدەردىڭ جەكە قۇرامنىڭ الدىنا شىعارىلۋى ۇيىمداستىرىلدى. ميتينگتە ءبولىم كومانديرلەرى جەكە قۇرامعا مەملەكەتتىك رامىزدەردىڭ تاريحىن, ءمانىن جانە ولارعا قاتىستى ەرەكشە دەرەكتەردى جەتكىزدى. ميتينگ سوڭىندا جەكە قۇرام رامىزدەردىڭ الدىندا ساپتىق شەرۋمەن ءوتىپ شىقتى.
- بىزدەردە ۇلى دا, ماعىناسى زور ەلتاڭبامىز, تۋىمىز بەن ءانۇرانىمىز بار. ولار - ەلىمىزدىڭ ۇلتتىق قۇندىلىعى جانە ماقتانىشى. اسكەري ادامدار ءۇشىن مەملەكەتتىك رامىزدەر وتانىمىزدىڭ بىردەن-ءبىر اتريبۋتى بولىپ سانالىپ, ەرەكشە قۇرمەتتەلەدى. ءبىزدىڭ ءاربىر ماڭىزدى ءىس-شارامىز مەملەكەتتىك ءانۇراندى ورىنداۋمەن باستالسا, ساپتىق الاڭداعى تۋدىڭ كوتەرىلۋى تەك ەڭ ۇزدىك اسكەري قىزمەتشىلەرگە بۇيىرادى, دەدى 25744 اسكەري ءبولىمىنىڭ كومانديرى گۆارديا پودپولكوۆنيگى مۇرات اراپباەۆ.