- اتىراۋ وبلىسىندا سپورتتى دامىتۋعا بارلىق جاعداي جاسالعان. وسىنداي شارالار وتكىزۋ ارقىلى سپورتتى, سالاماتتى ءومىر سالتىن ناسيحاتتاۋدى ماقسات ەتتىك. فەستيۆالدە سپورتتىڭ 20 ءتۇرى بويىنشا چەمپيوندار ونەر كورسەتتى. سولاردى كورىپ, اتا-انالار بالالارىن سپورت سەكتسيالارىنا الىپ كەلەدى دەپ ۇمىتتەنەمىز. جالپى وڭىردە سپورتپەن شۇعىلداناتىن ادامدار سانى جىل سايىن ارتىپ كەلەدى, - دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ.
وبلىس ورتالىعىنداعى بەيبارىس الاڭىندا وتكەن شارادا سپورتتىڭ 20 ءتۇرى تۋرالى قويىلىمدار قويىلدى. سونداي-اق, وتاندىق ەسترادا جۇلدىزدارى مەن جەرگىلىكتى ونەرپازداردىڭ كونتسەرتتىك باعدارلاماسى مەرەكەلىك كوڭىل-كۇي سىيلادى. كورەرمەنگە وڭىردەگى سپورت زالدارى مەن سەكتسيالار جايلى جازىلعان اقپاراتتىق پاراقشالار تاراتىلدى.
فەستيۆال قوناعى بولعان تانىمال ءانشى ەركە ەسماحان جاقىندا اتىراۋدا ەرلىكپەن قازا تاپقان پوليتسيا قىزمەتكەرى شالقار اقىمعاليەۆكە ارناعان «1001 ءتۇن» ءانىن ورىنداپ بەردى. جاس ساربازدىڭ ومىرىنەن سىر شەرتەتىن ءان شىعارىپ, بەينەبايان تۇسىرگەن انشىگە شالقاردىڭ ارىپتەستەرى ريزاشىلىق ءبىلدىرىپ, العىس حات تابىستادى.
- جاۋىنگەرلىك ونەر اسسوتسياتسياسى بۇل فەستيۆالدى جىل سايىن ءداستۇرلى تۇردە وتكىزۋدى جوسپارلاپ وتىر. قاتىسۋشىلاردىڭ دا, كورەرمەننىڭ دە كوڭىلىنەن شىققان شارا بولعانىنا قۋانىشتىمىز, - دەيدى اسسوتسياتسيانىڭ ايماقتاعى بولىمشەسىنىڭ باسشىسى ەرلان تابىلديەۆ.
اتىراۋ