ۇلتتىق كينونى قولداۋ مەملەكەتتىك ورتالىعى جۇمىسىن باستادى. بۇل تۋرالى مادەنيەت جانە سپورت ءمينيسترى ارىستانبەك مۇحامەدي ۇلى ءوز Facebook پاراقشاسىندا جازدى.
- جاقىندا الماتىدا Qazaqfilm ستۋدياسىندا مەملەكەتتىك ورتالىق جانىنان قۇرىلعان ەكسپەرتتىك كەڭەسىنىڭ ءبىرىنشى ءماجىلىسىن وتكىزدىك. اتالعان ۇيىمنىڭ كوللەگيالىق شەشىمى نەگىزىندە مەملەكەتتىك قارجى الۋعا ىرىكتەلگەن كينوتۋىندىلارعا مەملەكەتتىك قارجىلاي قولداۋ كورسەتىلەتىن بولادى, - دەپ جازدى ارىستانبەك مۇحامەدي ۇلى.
قازاقستان تاۋەلسىزدىك العالى وسى سالادا قابىلدانعان العاشقى زاڭنامالىق قۇجات - قر «كينەماتوگرافيا تۋرالى» زاڭعا سايكەس ۇلتتىق كينونى قولداۋ مەملەكەتتىك ورتالىعى قۇرىلدى. بۇل ۇيىمنىڭ قىزمەتىنىڭ نەگىزگى باعىتى ۇلتتىق كينونى قولداۋ, ونى حالىقارالىق دەڭگەيگە كوتەرۋ جانە الەمدىك نارىققا شىعارۋ, قازاقستان كينووندىرىسىنە ينۆەستيتسيا تارتۋ. اتالعان مەملەكەتتىك ورتالىق ارقىلى ۇلتتىق فيلمدەرگە, ۇلتتىق فيلم اتاعىن يەلەنۋگە نيەتتى كينوجوبالارعا مەملەكەت تاراپىنان قارجىلاي قولداۋ كورسەتىلىپ, سونىمەن قاتار كينەماتوگرافيا سالاسىندا سۋبسيديالار بەرۋ ىسكە اسادى.
الەۋمەتتىك جەلىدەگى جازباسىندا مينيستر مەملەكەتتىك ورتالىقتىڭ قۇرىلىمىندا جوعارى بىلىكتى توپ-مەنەدجەرلەر جانە ەڭبەگى سىڭگەن كينەماتوگرافيستەرمەن قاتار كرەاتيۆتى جاس ماماندار بار دەپ جازادى.
- ورتالىققا جەتەكشىلىك ەتۋدى فيلوسوفيا عىلىمىنىڭ دوكتورى, قازاقستاننىڭ ەڭبەك سىڭىرگەن قايراتكەرى, قر 2050 جىلعا دەيىنگى مادەني ساياساتىنىڭ تۇعىرناماسىنىڭ جانە قر «كينەماتوگرافيا تۋرالى» زاڭىنىڭ اۆتورلارىنىڭ ءبىرى اندرەي حازبۋلاتوۆقا تاپسىرىلعان. مايتالمان رەجيسسيور ساتىبالدى نارىمبەتوۆ ۇلتتىق كينونى قولداۋ مەملەكەتتىك ورتالىعى كەڭەسشىسى قىزمەتىن اتقاراتىن بولادى. كينو سالاسىندا 50 جىلدان اسا قىزمەت ەتكەن ولجاباي مۇسابەكوۆ توراعا ورىنباسارى رەتىندە ۇلتتىق كينونىڭ دامۋىنا ءوز ۇلەسىن قوسادى. تيمۋر بەكمامبەتوۆتىڭ Bazelevs كومپانياسىندا ەڭبەك ەتەتىن, «پروفايل», «ىزدەۋ» فيلمدەرىنىڭ پروديۋسەرى يگور تساي ەكىنشى ورىنباسار رەتىندە كوممەرتسيالىق جوبالار سالاسىنا جاڭا لەپ اكەلەدى, - دەپ تولىقتىردى مينيستر.
سونىمەن قاتار, مەملەكەتتىك ورتالىققا الەمدىك كينوكومپانيالاردا جۇمىس تاجىريبەسى بار شتاتتان تىس كەڭەسشىلەر تارتىلعان. مەملەكەتتىك ورتالىق جانىنداعى كونسۋلتاتيۆتىك-كەڭەسشى ورگان – ەكسپەرتتىك كەڭەس قۇرامى دا تولىق. 2019 جىلعى 15 ناۋرىز كۇنى قابىلدانعان قر ۇكىمەتى قاۋلىسىنا سايكەس, ونىڭ قۇرامىنا قازاقستاندىق كينونىڭ اتاقتى قايراتكەرلەرى, مايتالمان شەبەرلەرى ەنىپ وتىر. اتاپ ايتار بولساق: اكتەر, رەجيسسەر, قازاقستاننىڭ ەڭبەك ەرى ءاسانالى ءاشىموۆ, كوركەم جانە انيماتسيالىق كينو رەجيسسيورى اداي ءابىلدينوۆ, «مەلومان» كومپانياسىنىڭ باس ديرەكتورى ۆاديم گولەنكو, اكتيور جانە كينورەجيسسيور دوسحان جولجاقسىنوۆ, ش.ايمانوۆ اتىنداعى «قازاقفيلم» اق ءبىرىنشى ۆيتسە-پرەزيدەنتى سەرىك جۇباندىقوۆ, ستسەناريشى, رەجيسسيور, وپەراتور احات يبراەۆ, رەجيسسيور, ستسەناريشى الەكسەي كامەنسكي, رەجيسسەر, اقىن, ش.ايمانوۆ اتىنداعى «قازاقفيلم» اق پرەزيدەنتى باقىت قايىربەكوۆ, اكتريسا, قازاقستان كينەمتوگرافيستەر وداعىنىڭ مۇشەسى جاننا قۋانىشەۆا, تەاتر رەجيسسيورى, جۇرگەنوۆ اتىنداعى قازاق ۇلتتىق ونەر اكادەمياسى رەكتورى اسحات ماەميروۆ, رەجيسسەر, كينودراماتۋرگ ساتىبالدى نارىمبەتوۆ, كينو جانە تەاتر اكتريساسى مەرۋەرت وتەكەشوۆا, ستسەناريشى, ونەرتانۋشى بەكبولات شەكەروۆ, Arman Cinema كينوتەاترلار جەلىسى باس ديرەكتورى باۋىرجان شۇكەنوۆ. ەكسپەرتتىك كەڭەستىڭ ءبىرىنشى ماجىلىسىندە داۋىس بەرۋ ناتيجەسىندە ءاسانالى ءاشىموۆ توراعا, ونىڭ ورىنباسارى - تەاتر رەجيسسيورى جانە پەداگوگ اسحات ماەميروۆ سايلاندى.
مينيستر ورتالىققا ۇلكەن ءۇمىت ارتا وتىرىپ, كينو قايراتكەرلەرى جۋىق ۋاقىتتا «كينەماتوگرافيا تۋرالى» زاڭنىڭ جاعىمدى تۇستارىن, سونىڭ ىشىندە ەكونوميكالىق پرەفەرەنتسيالار تۇرعىسىنان وڭتايلى باعا بەرەتىنىنە سەنىم ءبىلدىردى.
- زاڭعا سايكەس, قازاقستاندىق فيلمدەر كورپوراتيۆتىك تابىس سالىعىنان كىرىستىڭ 20% كولەمىندە بوساتىلادى - بۇل كينو كورسەتۋشىلەر ءۇشىن جاعىمدى جاعداي, ولار پروكاتقا ءبىزدىڭ فيلمدەردى جىبەرۋگە مۇددەلى بولادى. سونىمەن قاتار, ۇلتتىق كينونى 12% قوسىلعان قۇن سالىعىنان بوساتۋدى قاراستىردىق. ينۆەستيتسيا تارتۋ ءۇشىن ءبىز 30% ريبەيت ەنگىزدىك - بۇل الەم كينوكومپانيالارى ءۇشىن وتە ماڭىزدى, ولار ءوز جوبالارىن 45% دەيىن ريبەيت قامتاماسىز ەتەتىن ەلدەردە جۇزەگە اسىرادى. «كينەماتوگرافيا تۋرالى» زاڭنىڭ قابىلدانۋى جانە ۇلتتىق كينونى قولداۋ مەملەكەتتىك ورتالىعى قىزمەتىنىڭ باستالۋى وتاندىق قازاق كينوسىنىڭ دامۋى مەن قالىپتاسۋىنىڭ جاڭا تاريحىنىڭ باسى بولماق, - دەپ قورىتىندىلادى ارىستانبەك مۇحامەدي ۇلى.