قازىر اۋدانداعى شارۋا قوجالىقتارى مال باسىن كوبەيتىپ, ەگىن شارۋاشىلىعىن دا وركەندەتىپ وتىر. اسىرەسە جىلىجاي سانىن كوبەيتىپ, جىل ون ەكى بويى كوكونىس وسىرۋگە بەيىمدەلگەن ديقانداردىڭ ءىسى بەرەكەلى. سونىڭ ءبىرى سايماساي اۋىلىنداعى «ابيتوۆ» شارۋا قوجالىعى. وسى اۋىلعا ارنايى ات باسىن بۇرعان ءماجىلىس دەپۋتاتى سەرىك ۇمبەتوۆ جىلىجايدىڭ جۇمىسىن كوزبەن كوردى. الماتى قااسىنا جاقىن ورنالاسقان شارۋاشىلىق وندىرگەن ءونىمىن وتكىزۋگە قينالعان ەمەس. بۇگىندە تابيعي توپىراقتا وسىرىلگەن بالعىن قيار مەن قىزاناققا سۇرانىس بەرۋشىلەر قاتارى وسە تۇسكەن ەكەن. وسى «ابيتوۆ» شارۋا قوجالىعى ساۋىن سيىر ۇستاپ, ءسۇت تە وندىرەدى. اعارعانعا دا سۇرانىس بار. دەمەك, قوجالىق ءۇشىن تابىس كوزى تۇراقتى. تابىس بار جەردە ەڭبەك ونىمدىلىگى ارتا بەرمەك.
سايماساي اۋىلىنداعى «ايدارباەۆ» شارۋا قوجالىعىنىڭ دا تاسى ورگە دومالاپ تۇر. شارۋاشىلىقتا مال باسىن, ونىڭ ىشىندە ءسۇتتى سيىردىڭ سانى كوبەيىپ جاتىر. دايىن ءونىمدى قالاعا جونەلتەدى. تۇراقتى تۇتىنۋشىلارى بار. ەكىنشى جاعىنان ديقاندار باۋ-باقشا ەگىستىگىنە كوڭىل ءبولىپ وتىر. بۇل دا اقتالاتىن ەڭبەك.
ساپار بارىسىندا سەرىك ۇمبەتوۆ وڭىردەگى «Assorti Rancho» شاعىن دەمالىس ايماعىن دا ارالادى. بۇل وتباسىلىق دەمالىس ورتالىعى سايماساي اۋىلىنىڭ ءدال ىرگەسىندەگى ايدىندى كولدىڭ جاعاسىندا ورنالاسقان. اتى شاعىن بولعانىمەن, كول جاعاسى ارنايى كەلىپ دەمالۋشىلاردان بوسامايدى ەكەن.
– اگروتۋريزمدى دامىتۋعا وزىمىزشە ۇلەس قوسىپ جاتىرمىز. ءبىزدىڭ باستى ماقساتىمىز تىنىعۋعا كەلگەن ادامدارعا ساپالى قىزمەت كورسەتۋ. كەلۋشىلەر تابيعي ونىمگە قىزىعادى. تۇتىناتىن ەت, ءسۇت, كوكونىستىڭ بارلىعىن ءوزىمىز وسىرەمىز عوي. ەكولوگيالىق تازا ءونىم دەگەنىمىز وسى ءارى دەمالۋعا كەلگەن ادام ءدان ريزا بولىپ قايتادى, - دەيدى «Assorti Rancho» دەمالىس ورنىنىڭ باسشىسى توپجار جامالبەكوۆ.
الماتى وبلىسى