ەلوردادا شەتەلدەگى قازاق جاستارىنىڭ فۋتبول ءتۋرنيرى ءوتىپ جاتىر

بيىل بەسىنشى رەت ءوتىپ جاتقان جارىس جاستار جىلىنا ورايلاستىرىلعان. ەكى كۇنگە جالعاساتىن دوپ دوداسىنىڭ جۇلدە قورى – 3 ملن تەڭگە. «وتانداستار قورى» كەاق جانە دۇنيەجۇزىلىك قازاقتار قاۋىمداستىعى ۇيىمداستىرعان تۋرنيردە بۇل جولى موڭعوليا, رەسەي, وزبەكستان, يران جانە نۇر-سۇلتان, الماتى, قاراعاندى, اقتوبە قالالارىنان كەلگەن 22 كوماندا ويىن كورسەتۋدە. ءتۋرنيردىڭ اشىلۋ سالتاناتىندا ءسوز العان «وتانداستار قورى» ۆيتسە-پرەزيدەنتى ماعاۋيا سارباسوۆ مۇنداي باسقوسۋلاردىڭ شەتەلدەگى جاستاردىڭ اتاجۇرتىنا كەلىپ, ەلدى تانىپ-بىلۋىنە, جاستار ءوزارا تىعىز بايلانىس ورناتۋىنا مول مۇمكىندىك بەرەتىنىن اتاپ ءوتتى. سونداي-اق ول سپورتتىق ءىس-شارا بۇقارالىق سپورتتى دامىتىپ, وسكەلەڭ ۇرپاقتى پاتريوتتىق رۋحتا تاربيەلەۋگە وڭ ىقپال ەتەتىنىن ايتتى.

«وتانداستار قورى» قۇرىلعاننان باستاپ مادەنيەت, سپورت, كاسىپكەرلىك سياقتى بىرنەشە سالا بويىنشا قارىم-قاتىناستى دامىتۋعا بىلەك سىبانا كىرىسىپ جاتىر. سوڭعى جىلدارى كوپتەگەن سەبەپتەرمەن كوش سايابىرسىپ قالعانى راس. بۇل جارىس ءبىر جاعىنان قانداستارىمىزدىڭ تاريحي وتانىنا ورالۋىنا ىقپال ەتسە, ەكىنشى جاعىنان شەتتە تۋىپ-وسكەن قازاق جاستارىنىڭ ەلىمىزدىڭ جەتىستىكتەرىن تانىپ-بىلۋىنە مۇمكىندىك سىيلايتىنى ءسوزسىز», دەيدى «وتانداستار قورى» بايلانىس ورتالىعىنىڭ جەتەكشىسى مارات توقسانباەۆ.

جارىسقا ءتورت جىلدان بەرى ۇزبەي قاتىسىپ كەلە جاتقان بيىلعى فۋتزالدان وتكەن موڭعوليا چەمپيوناتىنىڭ جەڭىمپازدارى ەكەنىن اتاپ وتكەن ءجون. «Ulgii city» قۇراما كومانداسىنىڭ باپكەرى ەرتاي ورال ۇلى شاكىرتتەرى موڭعوليا تاريحىندا ەڭ كوپ گول سوققان اياق دوپ شەبەرلەرى ەكەنىن ماقتانىشپەن ايتا كەلىپ, بۇل جولى  «ۇزدىك ويىنشى» اتانعان 16 جاستاعى بالعىن كادىرحان ۇلى ونەر كورسەتەتىنىن جەتكىزدى.

وزبەكستان جاستارىن باستاپ كەلگەن ەركەبۇلان ەلمۇراتوۆ اتالعان تۋرنيرگە تۇڭعىش رەت قاتىسىپ وتىرعاندارىن ايتىپ, قۋانىشىن جاسىرمادى. «جارىسقا شاقىرۋ العانىمىزعا وتە قۋانىشتىمىز. مۇنداي باسقوسۋلار ءبىزدىڭ قازاقستاندى تانۋىمىزعا, جاڭا دوستار تاۋىپ, بايلانىس ورناتۋىمىزعا ۇلكەن سەپتىگىن تيگىزەرى ءسوزسىز», دەيدى ول.

الا دوپ دوداسىندا شەتەلدەن كەلىپ ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دايىندىق بولىمىندە وقىپ جاتقان جاستار دا باق سىناسۋدا. كوماندا كاپيتانى رامازان اسىلبەك «بۇل ءبىز ءۇشىن ۇلكەن سايىس. جاسىمىز كىشى بولسا دا ءوز كۇشىمىزدى سىناپ كورۋگە كەلدىك», دەيدى.