تاللينن قالاسىندا ەكونوميكالىق جانە عىلىمي-تەحنيكالىق ىنتىماقتاستىق جونىندەگى قازاقستان-ەستونيا ۇكىمەتارالىق كوميسسياسىنىڭ ءبىرىنشى وتىرىسى ءوتتى. اتالعان كوميسسيا 2009 جىلعى 7 قىركۇيەكتە ەستونيا پرەمەر-ءمينيسترى اندرۋس ءانسيپتىڭ قازاقستانعا رەسمي ساپارى بارىسىندا قول قويىلعان كەلىسىمگە سايكەس قۇرىلعان.
ۇكىمەتارالىق كوميسسيانى قازاقستان تاراپىن سىرتقى ىستەر مينيسترلىگىنىڭ جاۋاپتى حاتشىسى ءراپىل جوشىباەۆ, ال ەستوندىق جاقتى ەكونوميكا جانە كوممۋنيكاتسيالار ءمينيسترى يۋحان پارتس باسقاردى. كوميسسيا وتىرىسى بارىسىندا ەكىجاقتى ارەكەتتەستىك ءماسەلەلەرى, سونىڭ ىشىندە كولىك جانە ترانزيت, ەنەرگەتيكا, اقپاراتتىق تەحنولوگيالار, تۋريزم, اۋىل شارۋاشىلىعى, ءبىلىم بەرۋ, عىلىمي زەرتتەۋلەر, مادەنيەت, دەنساۋلىق ساقتاۋ سەكىلدى ماسەلەلەر تالقىلاندى.
كوميسسيانىڭ ءتيىمدى جۇمىسى ەكى مەملەكەتتىڭ ساۋدا-ەكونوميكالىق جانە عىلىمي-تەحنيكالىق سالالارداعى ىنتىماقتاستىعىنىڭ تەرەڭدەتىلۋىنە مۇمكىندىك تۋعىزادى دەپ كۇتىلۋدە.
وتىرىس ناتيجەسىندە ەكى جاقتى ساۋدا-ەكونوميكالىق ىنتىماقتاستىقتىڭ پەرسپەكتيۆالى باعىتتارى بەلگىلەنگەن حاتتاماعا قول قويىلدى.
ءراپىل جوشىباەۆتىڭ ەستونيا پرەمەر-ءمينيسترى اندرۋس انسيپپەن وتكەن كەزدەسۋىندە ونىڭ 2009 جىلدىڭ قىركۇيەك ايىندا استانا قالاسىنا ساپارى بارىسىندا قول جەتكىزىلگەن كەلىسىمدەردى دامىتۋعا باعىتتالعان قازاقستان مەن ەستونيا اراسىنداعى قارىم-قاتىناستارىنىڭ وزەكتى ماسەلەلەرى تالقىلاندى. ەستونيا ۇكىمەتىنىڭ باسشىسى قازاقستاننىڭ حالىقارالىق بەدەلىن جوعارى باعالاي وتىرىپ ەلىمىزدىڭ ەقىۇ-داعى توراعالىعىنا جەتىستىكتەر تىلەدى.
تاللينن قالاسىنا ساپارى بارىسىندا قازاقستاندىق دەلەگاتسيا باسشىسى ەستونيا پارلامەنتى ەكونوميكالىق كوميتەتى توراعاسى ۋ.كلااسپەن, قازاقستانمەن ىنتىماقتاسۋ جونىندەگى پارلامەنتتىك توبىمەن, ەستونيا سىرتقى ىستەر ءمينيسترى ورىنباسارى ك.كۋللمەن, “تاللينن كەمەجايى”, “ەستونيا تەمىر جولدارى” جانە “ەستي ەنەردجي” كومپانيالارى باسشىلارىمەن كەزدەسىپ, قازاقستان مەن ەستونيا اراسىنداعى ەكى جاقتى جانە كوپ جاقتى فورماتتارىندا ارەكەتتەسۋ ماسەلەلەرىن قاراستىردى, دەپ حابارلادى سىرتقى ىستەر مينيسترلىگىنىڭ ءباسپاسوز قىزمەتى.