بەس كۇندىك سەمينار «BI-Zhuldiz-Ai» كورپوراتيۆتىك قورىنىڭ كومەگىمەن ۇيىمداستىرىلدى. شارا بالالار پراكتيكاسىندا توتەنشە جاعدايلار بويىنشا وتاندىق انەستەزيولوگتار مەن رەانيماتولوگتاردى وقىتۋ, سونداي-اق بالالاردىڭ تۋا بىتكەن اقاۋلارىن حيرۋرگيالىق ەمدەۋدىڭ زاماناۋي ادىستەرىن ۇيرەتۋ ماقساتىندا وتكىزىلىپ وتىر. كۋرسقا قاتىسۋشىلار – استانالىق جانە ايماقتىق دارىگەرلەر.
وقۋ-ادىستەمەلىك وپەراتسيالاردى البرەحت اتىنداعى سانكت-پەتەربۋرگ مەديتسينالىق-الەۋمەتتىك ساراپتاما, پروتەزدەۋ جانە مۇگەدەكتەردى وڭالتۋ عىلىمي-پراكتيكالىق ورتالىعىنىڭ جەتەكشى پروفەسسورى يگور شۆەدوۆچەنكو جانە سانكت-پەتەربۋرگ قالاسىنىڭ مۇگەدەكتەرگە ارنالعان مەديتسينالىق-الەۋمەتتىك ساراپتاما, پروتەزدەۋ جانە وڭالتۋ عىلىمي-پراكتيكالىق ورتالىعىنىڭ №1 بالالار ورتوپەديالىق بولىمشەسىنىڭ مەڭگەرۋشىسى اندرەي كولتسوۆ جۇرگىزۋدە.
«وسى ساپار بارىسىندا ءبىز ميكروحيرۋرگيالىق ەكى وپەراتسيا جاسادىق, بىرەۋى وتە كۇردەلى, ەكىنشىسى دە وڭاي ەمەس. ال ەرتەڭ تاعى ءبىر ميكروحيرۋرگيالىق وپەراتسيا جاسالادى دەپ جوسپارلانعان. وتالاردىڭ قيىندىعى نەدە؟ بۇل وپەراتسيالار وتە ماڭىزدى لوگيستيكالىق قولداۋدى قاجەت ەتەدى. بىزگە جۇمىس ميكروسكوپى, ارنايى شتاپەلدى ماتەريال, جاقسى قۇرالدار قاجەت. مۇنىڭ ءبارى وسىندا بار. ەكىنشىدەن, بۇل پاتسيەنتتەرگە ادەتتە جاقسى انەستەزيولوگ قاجەت. بۇل جولى سانكت-پەتەربۋرگتىڭ تانىمال انەستەزيولوگتارى بىزبەن بىرگە كەلگەنى وتە جاقسى. وسى جولى ءبىز 14 بالاعا وپەراتسيا جاسايتىن بولامىز», – دەدى يگور شۆەدوۆچەنكو.
بۇدان باسقا, رەسەيلىك دارىگەرلەر قالاداعى وڭالتۋ ورتالىقتارىن ارالادى.
«وندا ءبىز بالالاردىڭ وڭالتۋ راسىمىنەن قالاي وتەتىنىن قارايمىز, حيرۋرگيالىق ەمدەلۋگە مۇقتاج ادامداردى تاڭدايمىز, بۇرىن ءوزىمىز وپەراتسيا ىستەگەن بالالارىمىزدىڭ ناتيجەلەرىنە قارايمىز», – دەپ ءتۇسىندىردى ول.
شۆەدوۆچەنكو №2 قالالىق بالالار اۋرۋحاناسىنىڭ بازاسىن جوعارى باعالادى.
«مىسالى, ەگەر ءبىز بۇل ءبولىمدى 2,5 جىل بۇرىنعى بولىممەن سالىستىرساق, اراسى جەر مەن كوكتەي. اۋرۋحانا وتە جاقسى جابدىقتالعان. ءسىزدىڭ دارىگەرلەرىڭىز ءبىز باستاعان كوپتەگەن وپەراتسيالاردى وزدەرى يگەرىپ جاساپ جاتىر. بۇل وتە جاقسى», – دەدى شۆەدوۆچەنكو.