زاڭ جوباسىنا دەپۋتاتتار توبى باستاماشى بولدى. اتالعان زاڭ جوباسى ەلباسىنىڭ قازاقستان حالقىنا جولداۋلارىندا ايتىلعان, مەملەكەتتىك قىزمەتتەر كورسەتۋ ماسەلەسىندە «ءبىر تەرەزە» قاعيداتىنان «ءبىر ءوتىنىش» قاعيداتىنا كوشۋ, مەملەكەتتىك قىزمەتتەردى ەلەكتروندىق فورماتقا اۋىستىرۋدى ۇستىمىزدەگى جىلدا - 80 پايىزعا, كەلەسى جىلى ونى تاعى 10 پايىزعا كوبەيتۋ جونىندەگى, سونداي-اق «مەملەكەتتىك كورسەتىلەتىن قىزمەتتەر تۋرالى» زاڭدى جاڭارتۋ قاجەتتىگى تۇرعىسىنداعى تاپسىرمالارىن ىسكە اسىرۋ ماقساتىندا ازىرلەندى.
وسى ورايدا ءماجىلىس دەپۋتاتى مايرا ايسينا زاڭ جوباسىنىڭ نەگىزگى تۇستارىنا توقتالدى.
«بىرىنشىدەن, بۇگىنگى تاڭدا ادامدار تىركەلگەن جەرىنە بايلانعاننان كەيبىر قىزمەتتەردى وزىنە ىڭعايلى ەتىپ المايدى. وسىعان بايلانىستى, ازاماتتىق حال اكتىلەرىن تىركەۋدىڭ بارلىق جەتى ءتۇرى بويىنشا قىزمەت كورسەتۋدىڭ ەكساۋماقتىق قاعيداتىن ەنگىزۋ تۇرعىسىندا تۇزەتۋلەر ەنگىزىلىپ وتىر. بۇل قاعيداتتى ەنگىزۋ ارقىلى ازاماتتىڭ ءوتىنىشتى تۇرعىلىقتى جەرى بويىنشا بەرۋى مىندەتتى ەمەس. ءوز قالاۋى بويىنشا قازاقستان اۋماعىنداعى كەز كەلگەن تىركەۋشى ورگانعا بەرە الادى. بۇل بالا تۋ, نەكە قيۋ نەمەسە ونى بۇزۋدى, ادامنىڭ قايتىس بولۋى تۋرالى, اتىن جانە تەگىن وزگەرتۋدى, اسىراپ الۋدى, اكە بولۋدى انىقتاۋدى تىركەۋگە بايلانىستى», - دەدى م. ايسينا.