كەشە مەملەكەت باسشىسى نۇرسۇلتان نازارباەۆ يزرايل پرەزيدەنتى شيمون پەرەسپەن تەلەفون ارقىلى سويلەستى.
اڭگىمەلەسۋ بارىسىندا ەكىجاقتى ىنتىماقتاستىقتىڭ قازىرگى احۋالى مەن دامۋ بولاشاعى تالقىلاندى. تاراپتار يزرايل پرەزيدەنتىنىڭ قازاقستانعا جاساعان مەملەكەتتىك ساپارى بارىسىندا قول جەتكىزىلگەن ۋاعدالاستىقتاردى, سونىڭ ىشىندە جوعارى تەحنولوگيالار بويىنشا ءبىرلەسكەن قور قۇرۋدى ىسكە اسىرۋدىڭ ماڭىزدىلىعىن اتاپ ءوتتى.
قازاقستان مەن يزرايل پرەزيدەنتتەرى ەكى ەلدىڭ حالىقارالىق جانە وڭىرلىك ۇيىمداردىڭ, اتاپ ايتقاندا, ۇستىمىزدەگى جىلعى ماۋسىم ايىندا كەزەكتى ءسامميتى وتكىزىلەتىن اوسشك اياسىنداعى ارەكەتتەستىگى ماسەلەسىن تالقىلادى.
اڭگىمەلەسۋشىلەر سونداي-اق تاياۋ شىعىستاعى احۋال ءتوڭىرەگىندە ءسوز قوزعادى, وسى ورايدا قازاقستان پرەزيدەنتى بۇل ءوڭىردەگى قاۋىپسىزدىك پەن بەيبىتشىلىكتى ساياسي-ديپلوماتيالىق جولمەن قامتاماسىز ەتۋ قاجەتتىگى جونىندە پىكىر ءبىلدىردى.