بۇگىندە قىزىلوردا وبلىسىندا شاعىن جانە ورتا كاسىپكە ۇلكەن كوڭىل ءبولىنىپ وتىر. جاڭا جۇمىس, تابىستى كاسىپ باستاعىسى كەلگەندەرگە مەملەكەت تاراپىنان بەرىلەتىن كومەكتى ۇدايى ناسيحاتتاپ وتىرادى. بۇل ىسكە وبلىستىق كاسىپكەرلىك پالاتاسى مۇرىندىق بولىپ وتىر.
وبلىستىق پالاتاعا جاقىندا وسىدان ەكى جىل بۇرىن سۇلۋلىق سالونىن اشقان ايزادا اسقاربەك ەسىمدى كاسىپكەر كەلدى. ماماندىعى – قۇرىلىسشى. گاز سالاسىندا جۇمىس ىستەگەن ايزادا قارىنداسىمىز قۇي سەنىڭىز, قۇي سەنبەڭىز بۇگىندە قالاداعى تاڭداۋلى سۇلۋلىق سالونىنا اينالعان كاسىپ كوزىن اشقاندا قالتاسىندا 100 مىڭ تەڭگە عانا بولعان ەكەن. اپكەسى – شاشتاراز. ەلدىڭ ىشىندە كاسىپكەرلەر كوبەيىپ كەلە جاتقان شاق. ءبىر كۇنى اپكەسى «ايزادا, سەن سۋرەتتى جاقسى سالاسىڭ عوي. سۋرەتشىدەن جاقسى بەت ارلەۋشى شىعادى. نەگە ەكەۋمىز بىرىگىپ سۇلۋلىق سالونىن اشپايمىز» دەپ وي سالادى. «تاۋەكەل ءتۇبى − جەلقايىق, وتەسىڭ دە كەتەسىڭ» دەگەن قاناتتى ءسوز بار. بويىن جاڭا ىسكە دەگەن قۇشتارلىق كەرنەگەن ايزادا الماتىعا بارىپ, ساندي بەكسىرعانىڭ شەبەرلىك مەكتەبىندە ساباق الادى. تالاپتانعان ادامنىڭ ءورىسى كەڭ. ءسويتىپ ءوز كۇشىنە سەنگەن ەكەۋى ەكى ورىندىق, ەكى اينامەن جۇمىس باستاپ كەتەدى. ارينە ءبارى ويداعىداي بولماعان. ەكى قولدى ءبىر سىلتەپ, سالوندى ەندى قايتىپ كورمەسپىز دەگەن وي دا يەكتەگەن. سوندا دا شىدامدىلىق تانىتتى. ەندى بەينەتتىڭ ءتاتتى جەمىسىن جەپ وتىر. سالون كەڭەيگەن سوڭ جۇمىس تا كوبەيىپ, سەگىز ادامعا جۇمىس تاۋىپ بەردى.
ايزادانى كاسىپكەرلەر پالاتاسىنا جەتەلەپ كەلگەن كۇش − كاسىبىنىڭ كەرەگەسىن كەڭەيتۋ.
– جاقىندا تانىستارىمنان كاسىپكەرلەر پالاتاسىنىڭ «اtameken Services» پورتالىنىڭ مۇمكىندىكتەرى تۋرالى ەستىدىم. ماعان ەرەكشە ۇناعانى – «نەسيە اگرەگاتورى» ءبولىمى. سالوندى كەڭەيتۋ ءۇشىن مەملەكەتتەن جەڭىلدەتىلگەن نەسيە الىپ, عيمارات العىم كەلدى. بىراق بانكتەردىڭ تالابى, ارتىقشىلىعى, جەڭىلدىكتەرى تۋرالى قولىمدا اقپارات بولعان جوق. ءتىپتى بانك جاعالايتىن ۋاقىتىم دا جوق. بىرنەشە كۇن بۇرىن «اtameken Services» پورتالى ارقىلى ءوتىنىم بەردىم. ءوتىنىشىمدى بىرنەشە بانك قاتار قارايدى ەكەن جانە قاراۋ مەرزىمى دە ۇزاق ەمەس. جاقىن كۇندەرى وڭ قورىتىندى الىپ, كوزدەگەن ماقساتىما جەتەمىن دەگەن ۇمىتتەمىن. بانك ارالاپ شارشاماي, توپىرلاعان قاعازداردى الىپ جۇرمەي, ماسەلەمنىڭ وسىلايشا وڭاي شەشىلىپ جاتقانى قۋانتادى, – دەيدى ايزادا اسقاربەك.
ايتا كەتۋ كەرەك, «Atameken Services» − بۇل بيزنەسكە ارنالعان پايدالى ءارى تەگىن قىزمەتتەر ۇسىناتىن پلاتفورما. «نەسيە اگرەگاتورى» – كەڭسەدەن شىقپاي-اق ونلاين تۇرىندە جەڭىلدىكپەن نەسيە الۋعا ءوتىنىم تولتىرىپ, ەلىمىزدىڭ بارلىق قارجى ينستيتۋتتارى مەن بانكتەرىنە تاپسىرىس بەرە الاتىن ۇلكەن مۇمكىندىك.
جاس كاسىپكەر وسى مۇمكىندىكتى پايدالانىپ وتىر.
باقتيار تايجان,
«Egemen Qazaqstan»
قىزىلوردا وبلىسى