بۇل اتاۋلى كۇن العاش رەت 2014 جىلى 27 اقپاندا فينليانديانىڭ حەلسينكي قالاسىندا حالىقارالىق دەڭگەيدە اتالىپ وتكەن. ول تۋرالى ليتۆاداعى بالتىق تەڭىزى ايماعىنىڭ IX ۇكىمەتتىك ەمەس ۇيىمدار (ۇەۇ) فورۋمىنىڭ 8-ءشى سامميتىندە جاريالانعان ەدى. شارا ۇەۇ مەن مەملەكەتتىك ورگاندار اراسىندا ارىپتەستىك ورناتۋ, جاس جانە كاسىبي ۇەۇ-لاردى قولداۋ, ءوزارا تاجىريبە الماسۋ ماقساتىندا ۇيىمداستىرىلعان.
ەركىن فورماتتاعى شارادا قۇتتىقتاۋ ءسوز العان قوعامدىق دامۋ ۆيتسە-ءمينيسترى سەرگەي كونوۆالوۆ: «ۇەۇ قازىر بەلسەندى, ولاردىڭ ءۇنىن كەز كەلگەن جەردە ەستۋگە بولادى. قازىر قوعامداعى ەشبىر جۇمىس ۇەۇ-رسىز جانە ولاردىڭ قولداۋىنسىز وتپەيدى. وسىدان-اق مۇنداي ۇيىمداردىڭ ىقپالىن بىلۋگە بولادى», دەدى. ول اۋتيست بالالاردى ەمدەيتىن, ينكليۋزيۆتى ءبىلىم بەرەتىن, مۇمكىندىگى شەكتەۋلى جاندارعا جاردەمدەسەتىن, جالپى الەۋمەتتىك جوبالارمەن اينالىساتىن ۇەۇ-لاردى قولداۋعا مەملەكەتتىڭ ءاردايىم دايىن ەكەنىن تىلگە تيەك ەتتى.
بۇگىندە ەلىمىزدە 29398 ۇەۇ بار. ولاردىڭ قۇقىعىن قورعايتىن تىكەلەي مەملەكەتتىك ورگان – قوعامدىق دامۋ مينيسترلىگى. اڭگىمەنى وسىدان باستاعان ازاماتتىق باستامالاردى قولداۋ ورتالىعىنىڭ ءتورايىمى باتيما مۋكينا بىزگە بەرگەن سۇقباتىندا: «ۇەۇ-لاردىڭ قوعامداعى ءرولى وتە زور. ويتكەنى ۇكىمەتتە بۇكىل حالىقتىڭ قاجەتتىلىگىن وتەۋگە مۇمكىندىك بولا بەرمەيدى. سوندايدا ۇەۇ-لار بارلىق سالادا بەلسەندىلىك تانىتۋعا ءتيىس. جاستار جىلى اياسىندا اتالعان ۇيىمداردىڭ الەۋمەتتىك جوبالارىنا ارناپ مەملەكەتتەن بيىل جىلداعىدان بولەك تاعى 25 گرانت ءبولىندى. قازىر 100-دەن اسا ۇەۇ كونكۋرسقا قاتىسىپ جاتىر. بۇگىنگى شارا ۇەۇ-لاردى مەملەكەتتىڭ مۇمكىندىكتەرىنەن قالىس قالماۋعا, قوعامدىق جۇمىستارعا اتسالىسۋعا, ۆولونتەرلىككە قىزىعۋشىلىق تانىتۋعا شاقىرادى», دەدى.
«بولاشاق» قاۋىمداستىعىنىڭ اتقارۋشى ديرەكتورى لاۋرا دەمەسىن: «بولاشاق» باعدارلاماسى تۇلەكتەرىنىڭ باستاماسىمەن قۇرىلعان ءبىزدىڭ قاۋىمداستىق تا – 2000-عا جۋىق مۇشەسى بار ۇكىمەتتىك ەمەس ۇيىم. بۇگىنگى شارادا ۇيىمداستىرۋشى رەتىندە اتسالىسىپ وتىرمىز. 150-گە تارتا وتاندىق جانە شەتەلدىك ۇيىمدار قاتىسۋدا. وسى ارقىلى قازاقستاندىق ۇەۇ-ڭ شەتەلدىك, حالىقارالىق ۇيىمدارمەن سەرىكتەستىكتە جۇمىس ىستەۋىن قولداعىمىز كەلەدى», دەدى. ايتا كەتەيىك, اتالعان قاۋىمداستىق الەۋمەتتىك جوبالاردى جۇزەگە اسىرىپ ءجۇر. بىلتىر «نۇر وتان» پارتياسىنىڭ قولداۋىمەن قازاقستانداعى 5000-نان استام اۋىل وقۋشىلارىنا تەگىن, ەكى ايلىق اعىلشىن كۋرسىن ۇيىمداستىرعان.
بۇدان بولەك, شارا اياسىندا ءار سالادا ءتۇرلى, پايدالى جانە قىزىقتى شەبەرلىك ساباقتار جۇرگىزىلدى. وندا ماماندار مەن قاتىسۋشىلار ءوزارا تاجىريبە الماسىپ, ۇەۇ-لاردى دامىتۋدىڭ, ونداعى جۇمىستاردى جۇيەلى جۇرگىزۋدىڭ جولدارىن قاراستىردى.
ايدانا شوتبايقىزى,
«Egemen Qazaqstan»