21-22 اقپان كۇندەرى پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ حاتشىسى تولەۋبەك مۇقاشەۆ, كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ حاتشىسى دۋلات قۇسداۋلەتوۆ جانە ەكونوميكالىق ساياسات, يننوۆاتسيالار جانە كاسىپكەرلىك كوميتەتىنىڭ مۇشەسى ميحايل بورتنيك قۇرامىنا ەنگەن پارلامەنت سەناتىنىڭ دەلەگاتسياسى ۆەنا قالاسىندا وتكەن ەقىۇ پارلامەنتتى اسسامبلەياسىنىڭ قىسقى سەسسياسىنا قاتىستى. بۇل تۋرالى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى حابارلادى.
دەپۋتاتتار تۇراقتى كوميتەتتىڭ, ساياسي ماسەلەلەر جانە قاۋىپسىزدىك, ەكونوميكالىق ماسەلەلەر, عىلىم, تەحنولوگيالار جانە قورشاعان ورتا, دەموكراتيا, ادام قۇقىقتارى جانە گۋمانيتارلىق ماسەلەلەر جونىندەگى جالپى كوميتەتتەردىڭ وتىرىستارىنا, سونداي-اق ءۇش جالپى كوميتەتتىڭ بىرلەسكەن وتىرىستارىنا قاتىستى.
ت.مۇقاشەۆ ساياسي ماسەلەلەر جانە قاۋىپسىزدىك كوميتەتىنىڭ وتىرىسىندا ءسوز سويلەپ, ەلباسى ن.ءا.نازارباەۆتىڭ جاھاندىق تۇرعىداعى الىپ ەلدەر – اقش, رەسەي, قحر جانە ەو اراسىنداعى كەزدەسۋدى ۇيىمداستىرۋ جونىندەگى باستاماسىنىڭ ماڭىزدىلىعىن اتاپ ءوتتى. سەناتور سونداي-اق 2020 جىلى قاۋىپسىزدىكتىڭ وزەكتى ماسەلەلەرى بويىنشا ەقىۇ-نىڭ كونفەرەنتسياسىن, ەقىۇ, اوسشك جانە اسەان ايماقتىق فورۋمى حاتشىلىقتارىنىڭ كەزدەسۋىن وتكىزۋ باستامالارى تۋرالى حاباردار ەتتى.
م.بورتنيك ەكونوميكالىق ماسەلەلەر, عىلىم, تەحنولوگيالار جانە قورشاعان ورتا جونىندەگى جالپى كوميتەتكە قاتىسۋشىلاردى ءۇشىنشى جاڭعىرۋ باعدارلاماسى اياسىندا ەلىمىزدە وتكىزىلىپ وتىرعان رەفورمالاردى تانىستىرىپ, بۇۇ ورنىقتى دامۋ ماقساتتارىن ىسكە اسىرۋداعى قازاقستاننىڭ جەتىستىكتەرىن اتاپ ءوتتى.