وتكەن جىلى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ باستاماسىمەن يۋنەسكو «EDTECH-KZ» حالىقارالىق ءبىلىم بەرۋ ورتالىعىنىڭ قولداۋىمەن ء«بىلىم بەرۋ اليانسى» كونسورتسيۋمى قۇرىلعان بولاتىن. قۇرامىنا استانا, الماتى, شىمكەنت قالالارىنىڭ جانە رەسپۋبليكا وبلىستارىنىڭ ءبىلىم بەرۋ باسقارمالارى كىرەتىن كونسورتسيۋمنىڭ ماقساتى – قر پەداگوگيكالىق جوعارى وقۋ ورىندارىندا باسەكەگە قابىلەتتى, زاماناۋي قوعام تالابىنا ساي كادرلار دايارلاۋ ۇردىستەرىن ۇيلەستىرۋ.
اباي اتىنداعى قازۇپۋ-دا ء«بىلىم اليانسى» كونسورتسيۋمى مۇشەلەرىنىڭ جينالىسىندا قازىرگى ءبىلىم بەرۋ جۇيەسىندەگى وزەكتى ماسەلەلەر مەن پەداگوگيكالىق كادرلاردى دايارلاۋ جانە كاسىبي بىلىكتىلىكتى ارتتىرۋ جاعدايىنا قاتىستى ماسەلەلەر تالقىلاندى.
اباي اتىنداعى قازۇپۋ قوعاممەن بايلانىس ءبولىمىنىڭ مالىمەتىنە سايكەس, اتالمىش ءىس-شاراعا اباي اتىنداعى قازۇپۋ رەكتورى تاكير بالىقباەۆ, «EDTECH-KZ» حالىقارالىق ءبىلىم بەرۋ ورتالىعىنىڭ باس ديرەكتورى عاني بەيسەمباەۆ, فينليانديادان كەلگەن حالىقارالىق ساراپشىلار: شىعىس فينليانديا ۋنيۆەرسيتەتىنىڭ دامۋ دەپارتامەنتىنىڭ جاھاندىق جانە ترانسۇلتتىق ءبىلىم بەرۋ جونىندەگى ۇيلەستىرۋشىسى, يۋۆياسكيۋليا ۋنيۆەرسيتەتىنىڭ ەمەريتۋس-پروفەسسورى يوۋني ۆاليارۆي, EduCluster Finland Oy وكىلدەرى يااككو سكانتسي, ەلينا حاريۋ, الماتى جانە ورتالىق ازياداعى يۋنەسكو كلاستەرلىك بيۋروسىنىڭ ءبىلىم بەرۋ سالاسى بويىنشا مامانى لينا بەنەتتە, سونداي-اق قازاقستان وڭىرلەرىنىڭ جانە استانا, الماتى, شىمكەنت قالالارىنىڭ ءبىلىم باسقارمالارىنىڭ باسشىلارى, پەداگوگيكالىق جوعارى وقۋ ورىندارىنىڭ رەكتورلارى, يۋنەسكو «EDTECH-KZ» حالىقارالىق ءبىلىم بەرۋ ورتالىعىنىڭ وكىلدەرى مەن قازۇپۋ باسشىلىعى قاتىستى.
ەلۆيرا سەرىكقىزى,
«ەqemen Qazaqstan»
الماتى