بۇگىن ەلىمىزدەگى مۋزەي مەكەمەلەرىنىڭ تاريحىنداعى العاشقى رەسپۋبليكالىق كاسىبي سەسسيا ەلوردادا تۇڭلىگىن ءتۇردى. «قازاقستان مۋزەيى: جاھاندانۋ جانە اقپاراتتاندىرۋ داۋىرىندەگى يدەيالار مەن شىندىقتار» رەسپۋبليكالىق كاسىبي سەسسياسى ەلباسى كىتاپحاناسىنىڭ مۋزەيىندە ءوتتى.
بۇل باسقوسۋعا ەلىمىزدىڭ ءار ايماعىنان كەلگەن, ونىڭ ىشىندە مادەنيەت باسقارماسى وكىلدەرى, وبلىستىق, قالالىق, اۋداندىق, اۋىلدىق مۋزەي مەكەمەلەرىنىڭ باسشىلارى, مۋزەي سالاسىنىڭ ساقتاۋشىلارى, رەستاۆراتورلارى, وزگە دە ماماندارى بار, باسى-اياعى 150-گە جۋىق ادام قاتىستى.
سەسسيانى ەلباسى كىتاپحاناسى ديرەكتورىنىڭ ورىنباسارى كۇلايشا اقتاەۆا اشتى:
– « ۇلى دالانىڭ جەتى قىرى» اتتى مەملەكەت باسشىسىنىڭ باعدارلامالىق ماقالاسىندا بەلگىلەنگەندەي, تاريحي ارتەفاكتىلەردى زەرتتەۋ مەن ناسيحاتتاۋدىڭ ادىستەرى مۋزەي مەكەمەلەرىنىڭ ءداستۇرلى, يننوۆاتسيالىق, كلاسسيكالىق, زاماناۋي ماقساتتارىنا نەگىزدەلەدى. تاۋەلسىزدىك ءداۋىرىنىڭ بىرەگەي تاريحي مۇراسى, مەملەكەت باسشىسىنىڭ جەكە قورى شوعىرلانعان مەكەمە رەتىندە ەلباسى كىتاپحاناسى «ن.نازارباەۆ: ءداۋىر, تۇلعا, قوعام» كوشپەلى كورمە جوباسى اياسىندا قازاقستاننىڭ ءبىر قاتار وڭىرىندە مۋزەي, ارحيۆ, كىتاپحانا سالالارىنىڭ ماماندارىنا ارنالعان كاسىبي سەسسيا وتكىزۋدى جالعاستىرۋدا. ساندىق جۇيەگە كوشۋ داۋىرىندە مۋزەي جيناقتارىنىڭ اقپاراتتىق الەۋەتىن باعالاماۋ مۇمكىن ەمەس. مۋزەيلەر زاماناۋي تەحنولوگيالار مەن باعدارلامالاردى قولدانا وتىرىپ, وزىندىك مادەني اقپاراتتىق كەڭىستىك قالىپتاستىرادى. مۋزەي سالاسىندا اقپاراتتىق تەحنولوگيالاردى ەنگىزۋ ءۇردىسى جادىگەرمەن جۇمىس جاساۋ ادىستەرىن وزگەرتىپ قانا قويماي, مۋزەي جيناعىن زەرتتەۋ مەن ناسيحاتتاۋ ساپاسىنا دا اسەر ەتەدى.
قاتىسۋشىلاردى سەسسيانىڭ ۋاقىت ءتارتىبى مەن فورماتىمەن تانىستىرعان كۇلايشا قابدۋاليقىزى «قازاقستان جانە باسقا ەلدەردىڭ زاماناۋي مۋزەيلەردىڭ الەمدىك مادەني كەڭىستىكتەگى ءوزارا ارەكەتتەستىك تاجىريبەسى مەن بىرىگۋى» تاقىرىبىندا بايانداما جاسادى. سونىمەن قاتار, ەلباسى كىتاپحاناسىنىڭ مۋزەي قۇندىلىقتارىن ەسەپكە الۋ جانە ساقتاۋ قىزمەتىنىڭ قىزمەتكەرلەرى وزدەرىنىڭ باياندامالارىندا ەلەكتروندىق دەرەكقوردى قالىپتاستىرۋ, عىلىمي-قور جۇمىستارىندا اقپاراتتىق رەسۋرستاردى قولدانۋ, مۋزەي جيناقتارىن جۇيەلەۋ مەن جىكتەۋ جانە قالپىنا كەلتىرۋ جۇمىستارىن جۇرگىزۋ ماسەلەلەرى بويىنشا وزەكتى ماسەلەلەرگە توقتالدى.
«Open Space» ۇلگىسىندە وتكەن ءىس-شارادا قاتىسۋشىلار مۋزەي سالاسىنىڭ يننوۆاتسيالىق تەحنولوگيالارى مەن قور ىزدەنىسىندە قولدانىلاتىن اقپاراتتىق رەسۋرستارمەن تانىسىپ, كاسىبي ماماندار ءوزارا پىكىر الماستى.
– بىلتىر ەلباسى كىتاپحاناسىنىڭ «نازارباەۆ: ءداۋىر, تۇلعا, قوعام» اتتى كوشپەلى كورمەسى ءبىزدىڭ اتىراۋ وبلىستىق ش.ساريەۆ اتىنداعى كوركەمسۋرەت جانە قولدانبالى-ساندىك ونەر مۋزەيىندە ءوتتى. سودان بەرى ەكى مەكەمە اراسىندا بەرىك بايلانىس ورناعان. قانداي شاراعا كەلسەك تە جۇمىسىمىزعا پايدالى اقىل-كەڭەستەر, ماڭىزدى ماعلۇمات الۋعا ۇمتىلامىز. بۇگىنگى «قازاقستان مۋزەيى: جاھاندانۋ جانە اقپاراتتاندىرۋ داۋىرىندەگى يدەيالار مەن شىندىقتار» رەسپۋبليكالىق كاسىبي سەسسياسىنان دا ءبىراز قۇندى مالىمەتتەر الدىق. اتىراۋ شالعاي جاتقان ولكە بولعاندىقتان, ساندىق جۇيەگە كوشۋ, ساندىق جۇيەنى جۇمىسىمىزعا ەنگىزۋ بۇل – ەڭ وزەكتى ماسەلە. ەندى بۇل جاڭاشىلدىقتى ءوز وڭىرىمىزدە دە جۇزەگە اسىراتىن بولامىز,-دەپ وي ءبولىستى اتىراۋ وبلىستىق ش.ساريەۆ اتىنداعى كوركەمسۋرەت جانە قولدانبالى-ساندىك ونەر مۋزەيىنىڭ باسشىسى تولەگەن ورىنباسار ۇلى.
الماتى وبلىسى, قاراساي اۋدانى, شامالعان اۋىلىنداعى «اتامەكەن» تاريحي-مادەني ورتالىعىنان كەلگەن باس قور ساقتاۋشى بۇلبۇل نۇربەكوۆا ەلباسىنىڭ بارلىق باستامالارى مەن يدەياسىن قولدايتىنىن ايتتى:
ء«بىزدىڭ ورتالىق ەلباسى كىتاپحاناسىمەن ءبىر باعىتتا تىعىز جۇمىس ىستەپ جاتىر. مەملەكەت باسشىسىنىڭ جاڭا تەحنولوگياعا دەگەن نەگىزگى يدەياسىن قولداي وتىرا, قازىرگى مۋزەيلەرگە وتە قاجەتتى ساندىق جۇيەنى ىسكە اسىرا باستادىق. بۇگىنگى سەسسيادان العان مۋزەي باعىتىنداعى جاڭاشىلدىقتار جۇمىسىمىزدى ودان ءارى جانداندىرا تۇسەدى دەپ ويلايمىن. مۋزەي سالاسىندا وسكەلەڭ ۇرپاققا جاڭا باعىتتاعى ساندىق جۇيە وتە قاجەتتى. اسىرەسە, قور ساقتاۋ قىزمەتى بويىنشا تاپتىرماس دۇنيە. جاڭا تەحنولوگيانى پايدالانا وتىرىپ, ءبىز كەلۋشىلەردى جان-جاقتى اقپاراتپەن قامتىپ, قىزىقتىرىپ كورسەتە الامىز».