ەندىگى ۋاقىتتا تانىمال بوكسشى وتاندىق ءتۋريزمنىڭ دامۋىنا ءوز ۇلەسىن قوساتىن بولادى دەپ حابارلايدى قازاقپارات ءتىلشىسى.
ەلشى اتاعىن بەرگەن ارنايى سەرتيفيكاتتى «Kazakh Tourism» ۇلتتىق كومپانياسى اق-نىڭ باسقارما توراعاسى راشيد كۇزەمباەۆ تابىس ەتتى.
«قازاقستاننىڭ تۋريزم ەلشىلەرى باعدارلاماسىن ءبىز وتكەن جىلى باستاعان بولاتىنبىز. ونداعى ماقسات - ەلىمىزگە جانە شەتەلگە تانىمال تۇلعالار ارقىلى وتاندىق ءتۋريزمدى ناسيحاتتاۋ مەن ونىڭ دامۋىنا ۇلەس قوسۋ. بيىل جاستار جىلىنا وراي ءبىز ەلشىلەر قاتارىن جاس بوكسشى, ەلىمىزدىڭ تۋىن دۇنيەجۇزىنە ابىرويمەن كوتەرىپ جۇرگەن سادريددين احمەدوۆپەن تولىقتىرۋدى ءجون كوردىك. سونداي-اق, ەلشىلىك سەرتيفيكاتىن تابىس ەتۋ ءراسىمىن ارنايى «Beibarys» دەمالىس بازاسىندا وتكىزۋىمىز كەزدەيسوق ەمەس. سەبەبى, بۇل جەردە دەمالىستان بولەك, سپورتپەن شۇعىلدانۋعا بارلىق جاعداي جاسالعان», - دەدى ول.
ۇلتتىق كومپانيا باسشىسىنىڭ ايتۋىنشا, ۇستىمىزدەگى جىلى ەلشىلەردىڭ قاتىسۋىمەن ىشكى ءتۋريزمدى ىلگەرىلەتۋگە ارنالعان بىرقاتار جوبالاردى جۇزەگە اسىرۋ جوسپاردا بار.
«مەن ءۇشىن بۇل كۇتپەگەن جاڭالىق جانە ۇلكەن جاۋاپكەرشىلىك. ەندىگى ۋاقىتتا مەن سپورتپەن قاتار ەلىمىزدىڭ تۋريزم سالاسىنىڭ ودان ءارى دامىپ, جاقسارۋىنا جاۋاپتىمىن. بوكسشى رەتىندەگى باستى ماقساتىم كوك تۋىمىزدى بيىك ۇستاپ ءجۇرۋ بولسا, ەلشى رەتىندەگى ماقساتىم قازاقستان ءتۋريزمىن دامىتۋعا ءسال دە بولسا ءوز ۇلەسىمدى قوسۋ», - دەدى سادريددين احمەدوۆ. سونىمەن قاتار, تانىمال سپورتشى ءوزىنىڭ دەمالىسىن قايدا وتكىزەتىنى تۋرالى دا ايتىپ ءوتتى.
«جەكپە-جەك وتكىزەر كەزدە جانە وعان دايىندىق بارىسىندا كوبىنەسە شەتەلدە بولامىن. سوندىقتان ەلگە جەتكەنشە اسىعامىن, ياعني ءوز ەلىمدە دەمالعاندى ءجون سانايمىن. ايتار بولسام, جۋىردا عانا دوستارىممەن بۋرابايدا دەمالىپ قايتتىم», - دەدى ول. ايتا كەتسەك, «Kazakh Tourism» ۇلتتىق كومپانياسىنىڭ تۋريزم ەلشىلەرى قاتارىندا سادريددين احمەدوۆتان بولەك, ەلىمىزدىڭ ماقتانىشى ديماش قۇدايبەرگەن, تانىمال ۇشقىشتار تالعات مۇساباەۆ, يۋري باتۋرين جانە تاعى باسقالار بار.