اقپان اينالماي جاتىپ كامەلەتكە تولماعانداردىڭ ۇيىنەن كەتىپ قالعانىنا پوليتسيا دەپارتامەنتىندە جەتى وقيعا تىركەلىپتى.
وبلىستىق پوليتسيا دەپارتامەنتى «ىدىس جۋمادىڭ» دەپ ۇرىسقان اناسىنىڭ ءسوزىن كوتەرە الماي ۇيىنەن بەزىپ كەتكەن جەتىنشى سىنىپ وقيتىن قىزدى قالاداعى بازار اۋماعىنان تاپقان.
ء«جاسوسىپىرىمدى يۋۆەنالدى جانە ءپاترۋلدى پوليتسيا وكىلدەرى جۇمىلا ىزدەدى. كوپقاباتتى ۇيلەردىڭ وجىرە, شاتىر, اۋلالارىن, قۇرىلىس ءجۇرىپ جاتقان وبەكتىلەردى, مەكەمەلەر اۋماعىن ارالاپ, تۇرعىنداردان سۇراستىردى. بالا قالا تۇرعىنىنىڭ حابارلاماسىنان – ەكى ساعاتتان كەيىن عانا ەسكى بازار ماڭىنان تابىلدى. پوليتسەيلەر جوعالعان قىزدى اتا-اناسىنا امان-ەسەن قولحاتپەن تاپسىردى», – دەيدى ءباسپاسوز قىزمەتى.
جاسوسپىرىمدەردىڭ ءسال نارسەگە بولا رەنجىپ ءوز-وزىنە قول سالۋ وقيعالارى رەسپۋبليكامىزدىڭ ءار تۇكپىرىندە ورىن الىپ جاتىر. مەكتەپتە مۇعالىمدەردەن بولەك, پسيحولوگتار بار بولعانىمەن كوبىنە وقيعانىڭ الدىن الۋدا دارمەنسىزدىك تانىتادى. جۋىردا الەۋمەتتىك جەلىدە بەلگىلى جۋرناليست سانجار كەرىمباەۆتىڭ فرانكل قاعيداتتارىنا نەگىزدەلگەن سۇحباتى جارىق كوردى. ءبىلىم وشاقتارىندا ءدارىس وقىعان ازامات قىسقا ۋاقىتتا جاقسى ناتيجەلەرگە جەتكەن. ادامدى داعدارىستان, توماعا-تۇيىق, كۇيزەلىستەن شىعاراتىن وسىنداي ساباقتار ۇرپاق تاربيەسىندە ناتيجە بەرەتىن سياقتى. اتا-انالار مەن ۇستازدار قاۋىمى زەرتتەپ كورسە ارتىق بولماس ەدى.
باقتيار تايجان,
«Egemen Qazaqstan»
قىزىلوردا وبلىسى