كانادا تەحنولوگيالارى جىلۋ جانە سۋ قۇبىرلارىنىڭ قىزمەتىن 1,5-2 ەسە ۇزارتادى

ەلىمىزدىڭ كوممۋنالدىق شارۋاشىلىعىن دامىتۋ ءۇشىن بىرلەسكەن ەكى تاراپ وزىق تەحنولوگيالار مەن ازىرلەمەلەردىڭ ترانسفەرىن جۇزەگە اسىرىپ, قازاقستان رەسپۋبليكاسىنىڭ اۋماعىندا تاجىريبە جۇزىندە پايدالانۋدى كوزدەيدى. ءارى اتالعان ۇيىمدار ۇزاق مەرزىمدى ارىپتەستىك ورناتۋ مۇمكىندىگىن قاراستىرادى. بۇل تۋرالى بۇگىن «تكش قازورتالىعى» اق ءباسپاسوز قىزمەتى حابار تاراتتى.

ءوز كەزەگىندە Black Powder Solutions جىلۋ جانە سۋمەن جابدىقتاۋ جۇيەلەرىنىڭ قۇبىرلارىندا ورناتىلعان ماگنيتتى سەپاراتورلاردىڭ كومەگىمەن سۋدى تازارتۋ تەحنولوگياسىن ۇسىنىپ وتىر. سەپاراتورلارداعى ارنايى سۇزگىلەر سۋدان قارا ۇنتاق بولشەكتەرىن (توت, تەمىر وكسيدى) الىپ تاستايدى. بۇل توتىعۋ ۇدەرىسىنىڭ باياۋلاۋىنا الىپ كەلەدى جانە قۇبىرلاردىڭ قىزمەت ەتۋ مەرزىمىن 1,5 – 2 ەسە ۇزارتۋعا مۇمكىندىك بەرىپ, پايدالانۋ تيىمدىلىگىن جاقسارتادى.  وسىنداي تەحنولوگيالار كومىرسۋتەك شيكىزاتى مەن تەحنولوگيالىق سۇيىقتىقتاردى تازارتۋ ءۇشىن تاۋ-كەن جانە مۇناي-گاز سالالارىندا قولدانىلادى.

Black Powder Solutions پرەزيدەنتى رودجەر سيمونسون (Roger Simonson) اتاپ وتكەندەي, تەحنولوگيا 18 جىل بۇرىن ويلاپ شىعارىلعان جانە قازىر 40 ەلدە قولدانىلادى:

ء«بىز ءوزىمىز ازىرلەگەن تەحنولوگيالاردى  ۇنەمى جاقسارتىپ وتىرامىز. ولاردى سولتۇستىك جانە وڭتۇستىك امەريكا, جاپونيا, وڭتۇستىك كورەيا, اۆستراليا, افريكا, تاياۋ شىعىس, ەۋروپا ەلدەرىندە كوپتەگەن كاسىپورىندار پايدالانادى. ماگنيتتى ءسۇزۋ تەحنولوگياسى ەكولوگيالىق تازا بولىپ تابىلادى جانە قورشاعان ورتاعا ەشقانداي تەرىس اسەر ەتپەيدى. قازاقستانعا العاش رەت كەلىپ تۇرمىز, بولاشاقتا وسىندا ءوز ۇستانىمىمىزدى بەكىتىپ, بيزنەسىمىزدى كەڭەيتىپ, كورشى ەلدەردىڭ نارىقتارىنا شىعۋعا مۇمكىندىك بەرەتىن بازا قۇرامىز دەپ ۇمىتتەنەمىز», – دەيدى رودجەر سيمونسون.

«تكش قازورتالىعى» اق ديرەكتورى – باسقارما مۇشەسى ءادىلحان ومىرباەۆ: «جاقىن ارادا Black Powder Solutions ماگنيتتىك سەپاراتورلارى ورال جانە اقتاۋ قالالارىندا ىستىق جانە سۋىق سۋمەن جابدىقتاۋدىڭ تەحنولوگيالىق ماگيسترالدارىندا ورناتىلادى. بىرنەشە اي بويى زەرتتەۋ جۇرگىزىلەدى. پيلوتتىق جوباوڭ ناتيجەلەر بەرگەن جاعدايدا, جوبانى باسقا وڭىرلەردە ىسكە اسىرۋ ماسەلەسى جانە قازاقستان اۋماعىندا وسىنداي جابدىقتار ءوندىرىسىن وقشاۋلاۋ مۇمكىندىگى قارالاتىن بولادى».

ايتا كەتۋ كەرەك, جاقىندا استانا مەن قىزىلوردادا جىلۋمەن قامتاماسىز ەتۋ قۇبىرلارىنىڭ قىزمەت مەرزىمىن ۇزارتۋعا جانە نىعايتۋعا ارنالعان Merus نەمىس توتىعۋعا قارسى اسپاپتارىن ورناتۋ جانە سىناقتان وتكىزۋ بويىنشا پيلوتتىق جوبا باستالدى. قازىرگى ۋاقىتتا جۇرگىزىلگەن زەرتتەۋلەر جاقسى ناتيجە كورسەتۋدە – سۋداعى تەمىر دەڭگەيى 80%-عا تومەندەدى. سونىمەن قاتار باسقا شەتەلدىك كومپانيالارمەن كەزدەسۋلەر وتكىزىلەدى. تكش سەكتورىنا نەعۇرلىم وزىق جانە ءتيىمدى شەتەلدىك تەحنولوگيالاردى تارتۋ بويىنشا جۇمىستى «تكش قازورتالىعى» قر ينۆەستيتسيالار جانە دامۋ مينيسترلىگىنىڭ 2017-2021 جىلدارعا ارنالعان ستراتەگيالىق جوسپارىن ىسكە اسىرۋ شەڭبەرىندە سالانىڭ ەنەرگيا تيىمدىلىگىن ارتتىرۋ جانە ساۋلەت, قالا قۇرىلىسى جانە قۇرىلىس قىزمەتى سالاسىنداعى ۇلتتىق يننوۆاتسيالىق جۇيەنى دامىتۋ سالاسىندا جۇرگىزۋدە.

ايناش ەسالي,

«Egemen Qazaqstan»

الماتى