تۇركيانىڭ ىستانبۇل قالاسىندا سەگىز قاباتتى تۇرعىن ءۇي قۇلادى. بۇل تۋرالى CNN Turk تەلەارناسى حابارلادى.
تەلەارنا مالىمەتىنشە, اپات سالدارىنان ەكى ادام قازا تاۋىپ, جەتى ادام جاراقاتتانعان.
ىستانبۇل قالاسىنىڭ اكىمى ءالي ەرلىكايدىڭ ايتۋىنشا, 14 پاتەرلىك تۇرعىن ءۇي 43 ادامعا پانا بولىپتى. سارسەنبى تۇستەن كەيىن ورىن العان اپاتتىڭ سەبەپتەرى ءالى دە بەلگىسىز.
اكىمشىلىكتىڭ حابارلاۋىنشا, تۇرعىن ءۇيدىڭ جوعارعى ءۇش قاباتى زاڭسىز سالىنعان.
وقيعا كەزىندە عيماراتتىڭ استىڭعى قاباتىنداعى توقىما تسەحىندا ادام بولماعان. بۇل تۋرالى جەرگىلىكتى شەنەۋنىك زەكي داگ ايتتى.
تەلەارنا اقپاراتىنا سايكەس, عيمارات جەرگىلىكتى ساعات 16:00-دە قۇلاعان. اپات ورنىنا ءورت سوندىرۋشىلەر, جەدەل جاردەم, پوليتسيا قىزمەتكەرلەرى جۇمىلدىرىلعان.