قارجىلىق ساۋاتسىزدىق پەن سالعىرتتىقتىڭ سالدارى تالايدىڭ باسىن تاسقا ۇرعىزدى. بۇگىندە جۇرتشىلىق بۇدان دۇرىس ساباق الا باستاعانداي. سوڭعى جىلدارى حالىقتىڭ قارجىلىق ساۋاتتىلىققا دەگەن ۇمتىلىسى ەداۋىر ۇلعايىپ كەلەدى. بۇل رەتتە ەكونوميكاعا بەلسەندىلىك تانىتاتىن ازاماتتاردى اقپاراتتاندىرۋعا ارنالعان ىسكەرلىك باسىلىمداردىڭ ماڭىزى زور.
وتاندىق ىسكەرلىك باق نارىعىندا 17 جىلدان بەرى ۇزدىكسىز جۇمىس ىستەپ كەلە جاتقان «كۋرسيۆ» گازەتى قارجى, ەكونوميكا تاقىرىبىنداعى ساۋاتتى ساراپتامالىق ماقالالارىمەن كورىنىپ جۇرگەن ىرگەلى ۇجىم دەپ ايتۋعا بولادى. جۇرگىزىلگەن زەرتتەۋ بويىنشا, باسىلىمنىڭ سايتىن بۇگىندە ايىنا 1,3 ميلليوننان استام ادام وقيتىنى انىقتالعان. بۇدان بىلاي وتاندىق وقىرماندار ءۇشىن ىسكەرلىك جۋرناليستيكاداعى الەمنىڭ ۇزدىك باسىلىمىندا باسىلعان بيزنەس پەن قارجى سالاسىنداعى ۇزدىك ماقالالاردى وقۋعا مۇمكىندىك تۋىپ وتىر. بۇلاي دەيتىنىمىز, «كۋرسيۆ» گازەتىنىڭ قۇرىلتايشىسى Alteco Partners جشس-ءى الەمدىك مەديانارىقتاعى ەكونوميكا تاقىرىبىنىڭ ساردارى سانالاتىن The Wall Street Journal گازەتىمەن كوممەرتسيالىق نەگىزدەگى سەرىكتەستىك-بايلانىسىن باستاعانىن مالىمدەدى.
سەرىكتەستىك اياسىندا «كۋرسيۆ» گازەتىندە جانە kursiv.kz سايتىندا اپتا سايىن The Wall Street Journal باسىلىمىنان ىرىكتەپ الىنعان ماقالالار ورىس تىلىندە ۇسىنىلادى. وسىلايشا The Wall Street Journal جەرگىلىكتى وقىرماندار ءۇشىن ءوزىنىڭ ماقالالارىن اۋدارۋعا جانە جاريالاۋعا دا جول اشىپ وتىر. قازاقستاندىق گازەت بەدەلدى كورپوراتسيامەن ىسكەرلىك سەرىكتەستىك اياسىندا The Wall Street Journal باسىلىمىنىڭ ەلەكتروندىق نۇسقاسىنىڭ ساناۋلى جىلدىق جازىلۋىن تاراتۋ قۇقىعىنا دا يە بولدى. «بۇل ءبىزدىڭ گازەتىمىزدىڭ تاريحىنداعى ماڭىزدى كەزەڭ عانا ەمەس, ول بارلىق قازاقستاندىق ىسكەرلىك جۋرناليستيكاداعى ماڭىزدى ءساتتىڭ ءبىرى. ءبىز ءدال The Wall Street Journal باسىلىمىمەن شىعارماشىلىق تىعىز بايلانىس ورناتاتىنىمىزدى ماقتان تۇتامىز», – دەيدى Alteco Partners جشس-ءنىڭ باس ديرەكتورى مارات قايىربەكوۆ.
«كۋرسيۆ» گازەتىنىڭ باس رەداكتورى دينارا شۋماەۆانىڭ سوزىنشە, ەكى جاقتى بايلانىس گازەتتىڭ دامۋىنا تىڭ سەرپىن بەرمەك. «الداعى ۋاقىتتا وقىرماندارىمىزعا امەريكاندىق جانە الەمدىك ەكونوميكانىڭ جاڭالىقتارىن ناقتى دەرەك كوزدەرىنەن بىلۋگە مۇمكىندىك بەرەتىن جوعارى دارەجەلى كونتەنت ۇسىناتىن بولامىز» - دەيدى ول.
وقىرماندارعا اقپارات بەرە كەتسەك, The Wall Street Journal– جاڭالىقتاردى, اقپاراتتى, تۇسىنىكتەمەلەردى جانە ساراپتاۋدى تاراتاتىن عالامدىق جاڭالىق كورپوراتسياسى. بەدەلدى كورپوراتسيا وقىرماندارعا ءباسپاسوز باسىلىمدارىن, ينتەرنەت سايتتاردى, ءموبيلدى كونتەنتتى, الەۋمەتتىك جەلىلەردەگى ماقالالاردى جانە ءتۇرلى ۆيدەولاردى ۇسىنادى. الەمدىك ىسكەرلىك پەن قارجى جاڭالىقتارىنىڭ باستاۋىش دەرەككوزى رەتىندەگى تاجىريبەسىن ەسكەرە وتىرىپ, باسىلىم اقش پەن الەمدەگى جاڭالىقتارعا قولجەتكىزۋگە مۇمكىندىك بەرەدى. سونىمەن قاتار, The Wall Street Journal ساياساتتا بولاتىن وقيعالاردى, ونەر, مادەنيەت, سپورت, دەنساۋلىق جانە lifestyle جايىندا دا جازادى. جۋرناليستيكا سالاسىندا ۇزدىك جەتىستىكتەرى ءۇشىن 37 پۋليتتسەر سىيلىعىنىڭ يەگەرى اتانعان.
ارمان وكتيابر,
«ەگەمەن قازاقستان»
الماتى