مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنتىنىڭ ۇيىتقى بولۋىمەن سىر وڭىرىندە «اقمەشىت - ادالدىق الاڭى» جوبالىق كەڭسەسى اشىلىپ, ءوز جۇمىسىن باستادى دەپ حابارلايدى «Egemen.Kz» ءتىلشىسى.
ءتۇرلى سالالاردا سىبايلاس جەمقورلىقتىڭ الدىن الۋ شارالارىن جۇرگىزەتىن جوبالىق كەڭسەنىڭ تۇسىندىرمە جۇمىستارى ءبىلىم سالاسىنان باستالدى.
ويتكەنى, سوڭعى جىلدارى ءبىلىم بەرۋ سالاسى سىبايلاس جەمقورلىققا بەيىم سالالاردىڭ العاشقى بەستىگىنەن تۇسپەي كەلەدى.
وبلىستىق ءبىلىم باسقارماسىنا قاراستى بارلىق كوللەدجدەر مەن مەكتەپتەردىڭ باسشىلارى قاتىسقان كەزدەسۋدە ءبىلىم سالاسىنداعى سىبايلاس جەمقورلىق تاۋەكەلدەرى جان-جاقتى تالقىلاندى.
كەزدەسۋ بارىسىندا ءبىلىم بەرۋ ۇيىمدارىنىڭ باسشىلارى قاراماعىنداعى قىزمەتكەرلەرىنىڭ قۇقىق بۇزۋشىلىقتارى ءۇشىن جەكەلەي جاۋاپكەرشىلىككە تارتىلۋى جونىندە كەلىسىمگە قول قويدى.
«كەلىسىم نەگىزىندە ديرەكتورلار ءبىلىم مەكەمەلەرىنە بولىنگەن بيۋدجەت قاراجاتىنىڭ اشىقتىعىن قامتاماسىز ەتۋدى جانە قىزمەت بابىن پايدالانىپ قىزمەتكەرلەردەن, اتا-انالاردان, ستۋدەنتتەردەن سىي-سىياپاتتار الماۋدى, اقشا جيناۋ فاكتىلەرىن بولدىرماۋدى جەكەلەي جاۋاپكەرشىلىكتەرىنە الادى. سونىمەن قاتار, كوللەدجدەردە سەسسيالاردىڭ تازا ءوتۋىن قاتاڭ باقىلاۋدا بولادى», - دەدى وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتى باسشىسىنىڭ ورىنباسارى بەرىكبول بايقوجاەۆ.
باقتيار تايجان,
«ەگەمەن قازاقستان»
قىزىلوردا وبلىسى.