تۇرعىندار مامىلەگە كەلە الماي ءجۇر

«ماقالادا كورسەتىلگەن جاتاقحانا قالا ورتالىعىندا ەمەس, قالاعا قاراستى قىزىلجارما اۋىلدىق وكرۋگىندە ورنالاسقان»,-دەيدى جاۋاپ حاتتا.

«تولىعىرىق ايتقاندا, قىزىلجارما اۋىلدىق وكرۋگىندەگى باتىرباەۆ كوشەسى 2ا مەكەن جايىنداعى 5 قاباتتى جاتاقحانا قۇرىلىسى 1974 جىلى باستالىپ 1979 جىلى پايدالانۋعا بەرىلگەن. جاتاقحانا 1997 جىلدان باستاپ جەكە مەنشىككە ءوتىپ كەتكەن.

سوندىقتان, "تۇرعىن ءۇي قاتىناستارى تۋرالى" زاڭىنىڭ 35 بابى جانە 50 بابىنىڭ 2 تارماعىنا سايكەس, مەنشىك يەلەرى ورتاق م ۇلىكتىڭ جانە دارا مەنشىكتەگى ءۇي-جايلاردىڭ ساقتالۋىنا جانە قاۋىپسىز پايدالانۋىنا جاردەمدەسۋگە جانە وعان جۇمسالاتىن شىعىستارىنا قاتىسۋعا مىندەتتەلەدى.

وسى زاڭعا جانە قر ۇكىمەتىنىڭ «وڭىرلەردى دامىتۋدىڭ 2020 جىلعا دەيىنگى باعدارلاماسىنىڭ» تالاپتارىنا سايكەس, كۇردەلى جوندەۋ جۇمىستارىن جۇرگىزۋگە مەنشىك يەلەرىنىڭ كەمىندە 70 پايىزىنىڭ كەلىسىمى بولۋى كەرەك. سودان كەيىن عانا كۇردەلى جوندەۋ جۇمىستارى جۇرگىزىلەدى.

الايدا, وسى جاتاقحانا تۇرعىندارىنىڭ ءار ءتۇرلى پىكىرلەرى, ءبىر مامىلەگە كەلە الماۋى سالدارىنان كەلىسسوز جۇمىستارى 3 جىلدان اسا ءجۇردى.

اتالعان جاتاقحانانى جاڭعىرتۋ باعدارلاماسى اياسىندا كۇردەلى جوندەۋدەن وتكىزۋ بويىنشا تۇرعىندارمەن ءتۇسىندىرۋ جۇمىستارى جۇرگىزىلىپ, 2018 جىلدىڭ اياعىندا تۇرعىنداردىڭ كەلىسىمى الىندى.

قازىرگى تاڭدا جاتاقحانانى كۇردەلى جوندەۋدەن وتكىزۋگە جوبالىق سمەتالىق قۇجاتتامالارى "رەمپروەكتسەرۆيس" جشس-مەن دايىندالۋدا.

جوبالىق سمەتالىق قۇجاتتامالارى دايىن بولعاننان كەيىن جاڭعىرتۋ جۇمىستارى جۇرگىزىلەتىن بولادى.

ايتا كەتۋ كەرەك, سوڭعى 6 جىلدىڭ ىشىندە قىزىلوردا قالاسى بويىنشا قر ۇكىمەتىنىڭ «وڭىرلەردى دامىتۋدىڭ 2020-شى جىلعا دەيىنگى باعدارلاماسى» اياسىندا رەسپۋبليكالىق بيۋدجەتتەن بولىنگەن 3 ملرد. 200 ملن. تەڭگەگە 115 كوپقاباتتى تۇرعىن ءۇي كۇردەلى جوندەۋدەن ءوتتى.

بۇدان بولەك قايتارىمدى قاراجات ەسەبىنەن 600 ملن. تەڭگەدەن استام قارجىعا 16 تۇرعىن ۇيگە كۇردەلى جوندەۋ جۇرگىزىلدى".

اكىمدىك قايتا-قايتا قوزعالعان داۋلى ماسەلەگە وسىلاي جاۋاپ بەرىپ وتىر. جاتاقحانا تولىق جوندەۋدەن وتسە وسى تاقىرىپتى قوزعاعان اقپارات قۇرالدارىنىڭ دا ءۇمىتى اقتالار ەدى.

باقتيار تايجان,

«ەگەمەن قازاقستان»

قىزىلوردا وبلىسى.