بۇل جونىندە وبلىستىق تۇرعىن ءۇي-كوممۋنالدىق شارۋاشىلىعى جانە ەنەرگەتيكا باسقارماسى باسشىسىنىڭ مىندەتىن اتقارۋشى داۋرەن اسقاروۆ كەڭەيتىلگەن اپپارات ماجىلىسىندە ايتتى.
تاريف وبلىس قالالارى مەن اۋداندارىندا تومەندەي باستادى. جىلۋ باعاسى 14, اۋىز سۋ مەن كاناليزاتسيا تاريفى 10 پروتسەنتكە دەيىن ارزاندادى. ال ەلەكتر ەنەرگياسىن جەتكىزۋ 8 پروتسەنتكە دەيىن تومەندەدى.
وبلىستاعى بارلىعى 3458 كوپ قاباتتى تۇرعىن ءۇيدىڭ 2145-ن 228 جەكە مەنشىك پاتەر يەلەرىنىڭ تۇتىنۋشىلار كووپەراتيۆتەرى باسقارادى. قازىر بىرقاتار جپيتك تاريفتەردى تومەندەتە باستادى. ول رۋدنىي, قوستاناي قالالارى مەن جىتىعارا, قوستاناي اۋداندارىندا ەرەكشە بايقالدى.
«مىسالى رۋدنىي قالاسىنداعى «سپۋتنيك» كووپەراتيۆى تاريفتى 5 پروتسەنتكە تومەندەتتى.تاعى دا 31 كووپەراتيۆ ءتاريفتى تومەندەتۋدى قاڭتار ايىنىڭ اياعىنا جوسپارلاپ وتىر.ال جىتىقارا قالاسىنداعى بارلىق كووپەراتيۆتەر ءتاريفتى بىردەي دەڭگەيدە 3 پروتسەنتكە, قوستاناي اۋدانىندا 8 پروتسەنتكە ارزانداتتى» دەدى داۋرەن اسقاروۆ.
الايدا تاريفتىڭ تومەندەۋى وبلىستا بارلىق اۋدان مەن قالالاردا بىردەي ەمەس. ليساكوۆ قالاسىندا تەك ءبىر كووپەراتيۆ عانا 3 پروتسەنتكە تومەندەتكەن. قالعانى تۇرعىندار جيىنىنان كەيىن بەلگىلى بولاتىنىن ايتىپ وتىر. وبلىس اكىمى ارحيمەد مۇحامبەتوۆ جۇمىستى ءالى دە شيراق جۇرگىزۋ كەرەكتىگىن ايتتى.
«تاريفتى بۇرىنعى دەڭگەيىندە قالدىرىپ وتىرعان جەكەمەنشىك پاتەر يەلەرى تۇتىنۋشىلار كووپەراتيۆتەرىمەن جۇمىس جۇرگىزۋ كەرەك. ليساكوۆ قالاسىندا ءبىر عانا كووپەراتيۆ تاريفتى تومەندەتكەن, ال قالعانى قاشان ورىندايدى؟ بۇل تاپسىرما قازان ايىندا بەرىلگەن. جۇمىس ناشار ءجۇرىپ جاتىر دەگەن ءسوز. تۇرعىندار, اسىرەسە, الدىمەن زەينەتكەرلەر, حالىقتىڭ الەۋمەتتىك از قورعالعان بولىگى اقشانىڭ ۇنەمدەلگەنىن سەزىنۋى ءتيىس» دەدى ارحيمەد بەگەجان ۇلى.
ءنازيرا جارىمبەت,
«ەگەمەن قازاقستان»
قوستاناي