تايلاندتىڭ وڭتۇستىك جاعالاۋىنا «پابۋك» داۋىلى جاقىنداپ كەلەدى. قازىرگى تاڭدا ەلدە قۇتقارۋ جۇمىستارى جۇرگىزىلىپ, تۇرعىندار قاۋىپسىز ايماققا كوشىرىلدى.
سوڭعى مالىمەتتەرگە سۇيەنسەك, «پابۋك» داۋىلى سيام بۇعازىنان باتىسقا قاراي باعىت العان. قازىرگى تاڭدا ونىڭ جىلدامدىعى ساعاتىنا 65 كيلومەترگە جەتىپ وتىر.
تايلاندتىڭ گيدرولوگيالىق جانە اۋىلشارۋاشىلىق اقپاراتتار ينستيتۋتى مالىمەتىنە سۇيەنسەك, ناكحونسيتحاممارات اۋدانى ۇلكەن جاپا شەگۋى مۇمكىن. ويتكەنى, ونداعى جاعالاۋ 220 كيلومەترگە سوزىلعان. ناكحونسيتحامماراتتا اكىمشىلىگى داۋىلدان قورعانۋ ماقساتىندا 86 مىڭ ادامعا پانا بولاتىن 90 ورتالىق دايىندادى.
بۇدان بولەك, سۋراتتحاني, پحاتتحالۋنگ, سونگكحلا, پاتتاني, يالا, ناراتحيۆات, كرابي, ترانگ, ساتۋن, پراچۋاپكحيريكحان, چۋمپحون, رانونگ, پحانگنگا, پحۋكەت اۋىلدارىندا نوسەر جاڭبىر جاۋى مۇمكىن.
«پابۋك» داۋىلى تۋرالى مالىمەت الۋ ءۇشىن «ەگەمەن قازاقستان» گازەتىنىڭ ءتىلشىسى سامۋي ارالىندا دەمالىپ جاتقان نوۆوسيبيرسك قالاسىنىڭ تۇرعىنى تاتيانا كۋلمانوۆاعا حابارلاسقان بولاتىن. ونىڭ ايتۋىنشا, توتەنشە جاعدايعا قاراماستان, ايماق اكىمشىلىگى ەشقانداي شارا قابىلداماعان ەكەن.
«ازىق-ت ۇلىك پەن سۋ ساتىپ الىپ قويدىق. جاڭبىردان قورعايتىن كيىمدەرىمىز دە جانىمىزدا. دۇكەندەردىڭ جۇمىس كەستەسى اۋىسپالى, ازىق-ت ۇلىك ازايعان. ارال اكىمشىلىگى ەشقانداي ەسكەرتۋ جاساعان جوق. تەڭىزگە بارۋعا دا تىيىم سالىنبادى. توتەنشە جاعدايلار ورگاندارىنىڭ قىزمەتكەرلەرىن كورمەدىك. الايدا داۋىل داۋىسى بىرنەشە رەت ەستىلدى. قوناق ءۇيدىڭ شاتىرىنا شىعاتىن جولدى قاراستىرىپ قويدىق. بارلىعى جاقسى اياقتالادى دەپ سەنەمىز», دەدى ت.كۋلمانوۆا «ەگەمەن قازاقستان» گازەتى تىلشىسىنە بەرگەن سۇحباتىندا.
قازاقستاننىڭ سىرتقى ىستەر مينيسترلىگى كورسەتكەن مالىمەتكە ساي تايلاندتا 80 قازاقستاندىق دەمالىپ جاتىر. ايتسە دە, ۆەدومستۆو وكىلدەرى دەمالىسقا ءوز بەتىمەن, تىركەۋسىز كەلگەندەر بولۋى مۇمكىن ەكەنىن جوققا شىعارمايدى. ەلشىلىك وكىلدەرى سامۋي, پحۋكەت, پاتتايا ارالدارىنىڭ قوناق ۇيلەرىمەن بايلانىس ورناتقان. تايلاندتا دەمالىپ جاتقاندار قاتارىندا جۋرناليست ايگۇل مۇكەي, ءانشى ەركە ەسماحان جانە بلوگەر ايا بار. وكىنىشكە قاراي, «ەگەمەن قازاقستان» گازەتىنىڭ ءتىلشىسى تايلاندتاعى وتانداستارىمىزعا حابارلاسا العان جوق.
داۋىل – تەڭىزدە كۇشتى تولقىندار كوتەرەتىن, قۇرلىقتا ءبىرتالاي اپاتتارعا سەبەپ بولاتىن وتە كۇشتى جەل, تروپيكالىق تسيكلون. ادەتتە اتلانت, تىنىق مۇحيتى مەن كاريب تەڭىزىنىڭ اۋماعىندا بولادى. جويقىن داۋىلدار مۇحيت سۋىنىڭ تەمپەراتۋراسى 26 گرادۋس تسەلسيدەن اسقاندا پايدا بولادى. جىلى جانە سالقىن اۋامەن ارەكەتتەسكەن تەڭىز سۋى تىزبەكتى رەاكتسيا اسەرىنەن ءوز دەڭگەيىنەن كوتەرىلەدى. اۋا اعىنى ساعات تىلىنە قارسى اينالىپ, جەل جىلدامدىعى ساعاتىنا 130 كيلومەترگە دەيىن جەتەدى.
ءبىر قىزىعى, جىلدامدىعى ساعاتىنا 62 كيلومەتردەن اسقان داۋىلدارعا عانا ات بەرىلەدى ەكەن. 178 كيلومەتردەن اسقان داۋىلدار ءۇشىنشى كاتەگوريالىق داۋىلدارعا جاتقىزىلادى. ولاردىڭ كۇشى عيماراتتاردى قۇلاتۋعا جەتەدى. ءبىر ايماقتا بىرنەشە تروپيكالىق تسيكلوندار كەزدەسكەندىكتەن, ولاردى شاتاستىرماۋ ءۇشىن ناقتى ەسىم قويىلادى. بۇل اۋا رايى بولجامىن جاساۋعا, داۋىل جاعدايى تۋرالى ەسكەرتۋلەر جاساۋ ءۇشىن ماڭىزدى. داۋىلدارعا ەسىم بەرۋ 1852 جىلى باستاۋ العان.
سۆەتلانا عالىمجانقىزى,
«ەگەمەن قازاقستان»