جۋىردا شىمكەنت قالاسى بويىنشا مەملەكەتتىك كىرىستەر دەپارتامەنتىنىڭ باسشىسى نۇرالحان كوشەروۆتىڭ توراعالىق ەتۋىمەن سىرتقى ەكونوميكالىق قىزمەتكە قاتىسۋشىلارعا ارنالعان «كەدەندىك دەكلاراتسيالاۋدىڭ كەيبىر ەرەكشەلىكتەرى» تاقىرىبىندا دوڭگەلەك ۇستەل ءوتتى. جيىنعا «نۇر وتان» ساياسي پارتياسىنىڭ شىمكەنت قالاسى فيليالى, «اتامەكەن» كاسىپكەرلەر پالاتاسىنىڭ جاۋاپتىلارى قاتىستى.
جيىندا مەملەكەت باسشىسى العان قويعان «ۇلت جوسپارى – بەس ينستيتۋتسيونالدىق رەفورمانى جۇزەگە اسىرۋ جونىندەگى 100 ناقتى قادام» باعدارلاماسىندا ەكسپورتتىق جانە يمپورتتىق كەدەن راسىمدەرىنەن ءوتۋ كەزىندە ء«بىر تەرەزە» قاعيداسىن ەنگىزۋ ايتىلدى. سونداي-اق, ەلەكتروندى جاريا ەتۋ جۇيەسىن دامىتۋ (تاۋارلاردى كەدەندىك تازالاۋعا اۆتوماتتاندىرىلعان جۇيەنى ەنگىزۋ), ەكسپورت جانە يمپورت ءۇشىن قۇجاتتار سانىن جانە ولاردى وڭدەۋ ۋاقىتىن قىسقارتۋ جاعى ءسوز بولدى.
ۇلت جوسپارى مەن «تسيفرلى قازاقستان» باعدارلاماسىن جۇزەگە اسىرۋ ماقساتىندا قازاقستان رەسپۋبليكاسىنىڭ «قازاقستان رەسپۋبليكاسىنداعى كەدەندىك رەتتەۋ تۋرالى» كودەكسىمەن ەۋرازيالىق ەكونوميكالىق وداقتىڭ كەدەن شەكاراسى ارقىلى وتكىزىلەتىن تاۋارلارعا دەكلاراتسيانى ۇسىنۋدى مىندەتتى تۇردە ەلەكتروندىق تۇردە جۇزەگە اسىرۋ قاراستىرىلعان. وسى ماقساتتا «استانا-1» اقپاراتتىق جۇيەسى ەنگىزىلىپ وتىر.
اتالعان جۇيەنىڭ نەگىزگى ماقساتى – كەدەندىك رەسىمدەردى جىلدامداتۋ, سىرتقى ەكونوميكالىق قىزمەتكە قاتىسۋشىلاردىڭ ۋاقىتتىق جانە قارجىلاي شىعىندارىن قىسقارتۋ, ەلەكتروندى دەكلاراتسيالاۋ جۇيەسىن ەنگىزۋ, قۇجاتتار سانىنىڭ قىسقارۋىنا مۇمكىندىك تۋعىزۋ, الدىن الا اقپاراتتى ۇسىنۋ جانە كەدەندىك دەكلاراتسيانى شىعارۋ بولاتىن. بۇل ەڭ باستىسى, وسى جۇيەنى ەنگىزۋ ارقىلى كەدەن ورگانى مەن سىرتقى ەكونوميكالىق قىزمەتكە قاتىسۋشىلاردىڭ تىكەلەي قاتىناسىن قىسقارتۋ ارقىلى سىبايلاس جەمقورلىق كورىنىستەرىن ازايتۋعا مۇمكىندىك تۋدىرادى.
باسقوسۋ سوڭىندا قاتىسۋشىلارعا «استانا-1» اقپاراتتىق جۇيەسىندە جۇمىس جاساۋدىڭ نەگىزگى ەرەكشەلىكتەرى, باسشىلاردىڭ ازاماتتاردى قابىلداۋ كۇنى جانە كەدەن بەكەتتەرىنىڭ بايلانىس نومىرلەرى كورسەتىلگەن بروشيۋرالار تاراتىلدى.
نۇرشات توكەن,
«ەگەمەن قازاقستان»