تۇڭعىش پرەزيدەنت كۇنى قارساڭىندا اتباسار اۋدانىنىڭ كوپتەن بەرى تۇرعىن ءۇي كەزەگىندە تۇرعان بىرنەشە وتباسى باسپانالى بولدى.
اتباسار – كونە قالا. بۇرناعى جىلدارى قۇرىلىس قارقىنى دا باياۋ بولدى. سول سەبەپتى بۇل باسپانانى ۇمىتكەرلەر كوپتەن كۇتىپ جۇرگەن. ەندى مىنە, جاقسىدان شاراپات دەگەندەي, تۇڭعىش پرەزيدەنت كۇنى مەرەكەسى قارساڭىندا №1 شاعىن اۋداندا 45 پاتەرلىك تۇرعىن ءۇي پايدالانۋعا بەرىلدى. اقيقاتىندا بۇل تاۋەلسىزدىك جىلدارى كەزەككە لەككەن تۇرعىندارعا بەرىلىپ وتىرعان تۇڭعىش باسپانا. تاعى ءبىر ايتا كەتەرلىگى, باسپانالى بولعاندارعا پاتەر كىلتى ۇسىنىلا وتىرىپ, ەكى كۇن ىشىندە قۇرىلىس جۇمىستارىن جۇرگىزگەن مەردىگەرلەرگە ۇسىنىستارى مەن ەسكەرتۋلەرىن ايتۋعا مۇرسات بەرىلدى.
– پاتەرلى بولعاندار ىشىندە 9 بالالار ۇيلەرىنىڭ تاربيەلەنۋشىلەرى بار,–دەيدى اۋدان اكىمىنىڭ مىندەتىن اتقارۋشى بىرلىك قومباتىروۆ,–14 پاتەر الەۋمەتتىك جاعىنان از قامتاماسىز ەتىلگەن ادامدارعا ۇسىنىلدى. 21 پاتەر مەملەكەتتىك قىزمەتشىلەر مەن دارىگەرلەرگە, سونداي-اق جاس ماماندارعا بۇيىردى.
قالا اكىمىنىڭ ايتۋىنا قاراعاندا, قالىڭ كەزەكتى سەيىلتۋ ءۇشىن تاعى دا ەكى كوپقاباتتى تۇرعىن ءۇي سالىنۋدا. ال, مۇندا پاتەردىڭ زارىن تارتىپ جۇرگەندەر جەتەرلىك. ماسەلەن, جەرگىلىكتى اۋرۋحانانىڭ جان ساقتاۋ ءبولىمىنىڭ مەڭگەرۋشىسى ابىلقايىر شىرىنبەكوۆ باسپاناسى بولماعان سوڭ ەكى جىل بويى اۋرۋحانانى پانالاعان.
– مەن ءۇشىن اق تۇيەنىڭ قارنى جارىلعان كۇن بولدى,–دەيدى ابىلقايىر شىرىنبەكوۆ,–تۇڭعىش پرەزيدەنت كۇنى قارساڭىندا باپانالى بولدىم. ءبىز ءۇشىن ايتارى جوق, مول قۋانىش.
سوڭعى جىلدارى قارعىن سۋدان قاسىرەت شەككەن اتباساردا جاڭا شاعىن اۋدان بوي تۇزەگەن. كوكتەمگى سۋ تاسقىنىنان زارداپ شەككەن ادامدارعا 11 بەس قاباتتى ءۇي سالىندى. ەندى مىنە, كوپ جىلدان بەرى كەزەكتە تۇرعانداردىڭ دا قولدارى باسپاناعا جەتە باستادى.
قازاق «توي تويعا ۇلاسسىن» دەمەي مە, شىنىندا دا تۇڭعىش پرەزيدەنت كۇنى مەرەكەسى باسپانالى بولىپ شات-شادىمان قۋانىشقا بولەنگەن اتباسارلىقتاردىڭ اق جارىلقاپ تويىمەن جالعاستى.
بايقال ءبايادىل,
«ەگەمەن قازاقستان»
اقمولا وبلىسى