4 ساعاتقا سوزىلعان «حالىقتىق زاڭگەر» جالپىرەسپۋبليكالىق اكتسياسى كەزىندە, 45 مەملەكەتتىك ورگان ماماندارىنىڭ كومەگىنە جۇگىنگەن قالا تۇرعىندارى تەگىن قۇقىقتىق كومەك الۋ مۇمكىندىگىنە يە بولدى. سوت, پروكۋراتۋرا, ادىلەت, ۇكىمەتتىك ەمەس ۇيىمدار, جەرگىلىكتى اتقارۋشى ورگاندارىنىڭ زاڭگەرلەرى, كاسىبي ادۆوكاتتار مەن نوتاريۋستار 560 اداممەن تىلدەستى.
شارانى ۇيىمداستىرعان - قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىقققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى.
اكتسيانىڭ ماقساتى كەز-كەلگەن قۇقىقتىق ماسەلە بويىنشا حالىققا بىلىكتى تەگىن زاڭ كومەگىن كورسەتۋ. كەز-كەلگەن قۇقىقتىق ماسەلە جونىندە تۇرعىندارعا تەگىن ءارى بىلىكتى زاڭنامالىق كومەك كورسەتىلدى. كەڭەس الۋعا كەلگەندەردىڭ باسىم بولىگىن جەر ۋچاسكەلەرىن الۋ, باسپانالى بولۋ, ساپالى ءبىلىم, الەۋمەتتىك كومەك, بيزنەستى قولداۋ جانە مەديتسينا سالاسىنا قاتىستى ساۋالدار تولعاندىرعان.
قر مەملەكەتتىك قىزمەت ىستەرى جانە سىبايلاس جەمقورلىقققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى سىبايلاس جەمقورلىق پروفيلاكتيكاسى باسقارماسىنىڭ باسشىسى ناريمان ايتجانوۆ, ماڭعىستاۋلىقتار بۇل شاراعا اسا قىزىعۋشىلىق تانىتقانىن ايتادى. تۇرعىندار بىلىكتى زاڭگەرلەر مەن قۇزىرلى مەكەمە وكىلدەرىمەن تىكەلەي تىلدەسىپ, وزدەرىن تولعاندىرعان سۇراقتارعا تۇشىمدى جاۋاپتارىن الدى.
-قۇقىقتىق مۇددەلى مەملەكەتتىك ورگانداردىڭ وكىلدەرى دە بەلسەندى ەكەندىگىن ايتا كەتۋ كەرەك. بۇل جەردەگى باستى ماقسات - تەگىن قۇقىقتىق قىزمەت كورسەتۋ. ونىڭ ءوزى ۇلكەن ماسەلە بولىپ تابىلادى. سەبەبى كوپشىلىككە ءمالىم كەيبىر اقىلى تۇردەگى زاڭدى قىزمەت الا المايتىن ازاماتتارىمىز بار. جانە دە تيىسىنشە وسى قۇقىقتىق كومەك كورسەتىپ وتىرعان مەملەكەتتىك ورگانداردىڭ وكىلدەرى ءارى قاراي وسى ازاماتتاردىڭ ماسەلەلەرىن تۇپكىلىكتى, زاڭ جۇزىندە شەشۋگە تالاپتاناتىن بولادى, دەيدى ن. ايتجانوۆ.
اتالمىش جالپىرەسپۋبليكالىق شارا «حالىققا ءبىر مەزگىلدە تەگىن قۇقىقتىق كەڭەس كورسەتۋ» اتالىمى بويىنشا گيننەستىڭ رەكوردتار كىتابىنا ءوتىنىم بەرگەن. قازىرگى تاڭدا ارنايى كوميسسيا بارلىعىنىڭ دا ەرەجەگە سايكەس وتكەنىن تەكسەرۋدە.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى