التىنسارين اۋدانىنداعى وباعان اۋىلىنىڭ ء«سابينۇر» بوبەكجاي-بالاباقشاسىندا روبوتوتەحنيكا كابينەتى اشىلدى. ول ءۇشىن كابينەتكە الدىن الا جوندەۋ جۇمىستارى جۇرگىزىلىپ, كونسترۋكتورلار, جيھاز ساتىپ الىندى. جوبانى جۇزەگە اسىرۋعا دەمەۋشىلەردەن تارتىلعان 317 مىڭ تەڭگە جۇمسالدى.
كابينەتتە بۇلدىرشىندەر ءتۇرلى قۇراستىرۋ مەن روبوتوتەحنيكانىڭ نەگىزىمەن تانىساتىن بولادى. ول بالانىڭ وسە كەلە عىلىمي-تەحنيكالىق سالادا بازالىق ءبىلىمىن تولىقتىرادى جانە كەيىن يننوۆاتسيالىق تەحنولوگيالاردى تەز مەڭگەرۋىنە مۇمكىندىك جاسايدى.
«تسيفرلىق تەحنولوگيا ەكونوميكانىڭ دامۋىندا, الەۋمەتتىك سالانىڭ جاقسارۋىندا ماڭىزدى رول اتقارادى. سوندىقتان بالانىڭ ءبۇلدىرشىن كەزىنەن اقىلىنىڭ ۇشقىرلىعىن, كەز كەلگەن زاتتى, وقيعانى تالداي ءبىلۋى ماشىعىن, بويىنداعى تۇلعالىق ساپانى قالىپتاستىرۋ مەكتەپكە دەيىنگى ءبىلىمنىڭ مەملەكەتتىك جاڭارعان ستاندارتتارىنىڭ تالابى بولىپ تابىلادى» دەيدى كابينەتتىڭ اشىلۋىنا قاتىسقان «ورلەۋ» بىلىكتىلىگىن ارتتىرۋ ينستيتۋتىنىڭ مەكتەپكە دەيىنگى تاربيە, باستاۋىش ءبىلىم جانە تۇلعانى تاربيەلەۋ كافەدراسىنىڭ باس وقىتۋشىسى گۇلنار دىلدابەكوۆا.
كابينەتتىڭ اشىلۋى بۇلدىرشىندەر عانا ەمەس, اتا-انالار, اۋدان جۇرتشىلىعى ءۇشىن دە جاعىمدى جاڭالىققا اينالدى.
ءنازيرا جارىمبەت,
«ەگەمەن قازاقستان»
قوستاناي