اسىعىستاۋ بولساق تا جول بويى دۋمان ايتقان اڭگىمەگە قىزىعۋشىلىعىمىز وياندى دا, ال كەتتىك سوندا دەدىك. مۇنىمىزدى كۇتپەگەن جۇرگىزۋشى جىگىت ەرىكسىز سولعا بۇرىلدى. اسقار الاتاۋدىڭ بەتكەيىندەگى بۇلكىلدەپ اققان بۇلاققا قاراي ىنتامىز اۋدى.
ءسىز ەگەردە الماتىدان شىعاتىن قۇلجا جولىمەن اسپانتاۋدى بەتكە الىپ جولعا شىقساڭىز, 165 شاقىرىمنان كەيىن كوكپەك جازىعى قۇشاعىن ايقارا اشىپ, اقباس بيىك تاۋلاردىڭ كەيپىن كەڭەيتە تۇسەدى. وڭ بەتكەيگە نازار سالساڭىز, تورايعىر تاۋىنىڭ ادەمى اسپەتى بۇلاڭىتىپ, وزىنە مەنمۇندالاپ شاقىرا بەرەدى. جۋساندى سايدىڭ وزەگىندە جەر استىنان بۇلقىنا بۋىرقانىپ جاتقان قاينار بۇلاق سۋى توسكەيدە كوزىڭىزگە وتتاي باسىلادى. بۇل جەردىڭ تۇرعىندارىنا كوپتەن تانىس «رايىمبەك بۇلاعى» دەگەنىڭىز, وسى شىركىن! ايگىلى بۇقار جىراۋ, قابان جىراۋ, سابدالى جىراۋ, جامبىل مەن كودەك, تىلەمىس شايىرلار باتىردىڭ وشپەس ەرلىگىن جىرعا قوسىپ, كۇمبىرلەتە جىرلاعانىن بىلەمىز. «كيەلى مەكەن» اتاۋىمەن كۇرە جولدىڭ بويىنا الماتىدا, ەڭبەكشىقازاق جانە رايىمبەك اۋداندارىندا تۇراتىن باتىر بابانىڭ ۇرپاقتارى بۇل قاسيەتتى بۇلاق باسىنا ارنايى بارىپ, قاينار كوزىن تەمىر شارباقپەن ەرەكشەلەپ بەلگىتاس ورناتىپ قايتقان-دى. جول بويى دۋمان دوسىمىزدىڭ ايتىپ كەلە جاتقانى دا وسى بولاتىن. جارىقتىق, الدىمىزدا, كەزىندە كومىلىپ قالعان كوزىن اشقان رايىمبەك بابامىزدىڭ قاينار بۇلاعى. بۇل كۇندە ەلگە جەتۋگە اسىققانداي بۋىرقانىپ اعادى. جول بويى قانشا اسىقساق تا, قاسيەتتى قايناردىڭ كەسە تولى سۋىنان راحاتتانا مەيىرلەنە ۇرتتادىق.
«رايىمبەك بۇلاعى» ارى-بەرى وتكەن جولاۋشىنىڭ ساۋابىن الىپ بۋىرقانىپ قايناپ جاتىر. بۇلقىنا بەر, باتىر بابانىڭ ءمولدىر سۋى...
پاي شىركىن, رايىمبەك بۇلاعى...
ساپارباي پارمانقۇل,
«ەگەمەن قازاقستان»