پەتروپاۆل قالاسىنىڭ كىرە بەرىس قاقپاسىنا باتىر, ساردار, اقىن, مەملەكەت قايراتكەرى قوجابەرگەن جىراۋعا ەڭسەلى ەسكەرتكىش قويىلدى.
سالتاناتتى راسىمگە «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ, وبلىس اكىمى قۇمار اقساقالوۆ قاتىسىپ, ءسوز سويلەدى. شەشەندەر, باسقا دا سويلەۋشىلەر اتاقتى «ەلىم-اي داستانىنىڭ اۆتورى بابامىزدىڭ وشپەس ەرلىگى, ونەگەلى ءومىرى جۇرتشىلىق ەسىندە ساقتالاتىنىن, جاستارعا ۇلگى-ونەگە بولاتىنىن, ۇلىنى ۇلىقتاۋ ەل پارىزى ەكەنىن جەتكىزدى.
قولىنا دومبىرا ۇستاپ, ات ۇستىنە قونعان قوجابەرگەن ەسكەرتكىشىنىڭ بيىكتىگى 12 مەتر. اۆتورى–ەسىمى قازاقستانعا بەلگىلى ءمۇسىنشى قازىبەك ساتىبالدين.
قوجابەرگەن جىراۋ جامبىل اۋدانى گۇلتوبە جەرىندە دۇنيەگە كەلگەن. تاۋەلسىزدىك العاننان بەرگى كەزەڭدە اتاقتى جىراۋ, قولباسشى جايلى تاريحشىلار كوپتەگەن قۇندى ەڭبەكتەر جازدى. قازىر ونىڭ اتىندا مەكتەپ بار. «قوجابەرگەن جىراۋ–تاۋەلسىزدىكتىڭ, قازاق مەملەكەتتىلىگىنىڭ جانە حالىق بىرلىگىنىڭ سيمۆولى» دەگەن تاقىرىپتا م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە وتكەن عىلىمي-تاجىريبەلىك كونفەرەنتسيادا ۇلتتىق ۇلان پەتروپاۆل اسكەري ينستيتۋتىنا ونىڭ اتىن بەرۋ تۋرالى ماسەلە كوتەرىلىپ, ۇسىنىس قولداۋ تاپتى.
قوجابەرگەن تولىباي ۇلى – «جەتى جارعىنى» جازۋعا قاتىسقان, تاۋكە حاننىڭ زامانداسى, بوگەنباي باتىردىڭ ۇستازى, ۇلى ابىلاي حاننىڭ كەڭەسشىسى بولعان تاريحي تۇلعالاردىڭ ءبىرى. ەسكەرتكىشكە گۇل شوقتارى قويىلىپ, بابا رۋحىنا تاعزىم ەتىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى